പാലക്കാട്: പാലക്കാട് കല്ലേക്കാട് വ്യാസവിദ്യാപീഠം സ്‌കൂളിലെ സ്‌ഫോടനത്തില്‍ ബി.ജെ.പി പ്രവര്‍ത്തകന്‍ സുരേഷ് മൂത്താന്‍തറ പ്രതിയാണെന്ന് സംശയിക്കുന്നതായി പൊലിസ് എഫ്.ഐ.ആര്‍. സുരേഷിന്റെ വീട്ടില്‍നിന്ന് കണ്ടെടുത്തത് മനുഷ്യജീവന്‍ അപായപ്പെടുത്താവുന്ന സ്‌ഫോടകവസ്തുക്കളാണെന്നും എഫ്.ഐ.ആറില്‍ പറയുന്നു. കല്ലേക്കാട് സ്വദേശി നൗഷാദ് , പൂളക്കാട് സ്വദേശി ഫാസില്‍ എന്നിവരെയും പ്രതിപ്പട്ടികയില്‍ ഉള്‍പ്പെടുത്തിയിട്ടുണ്ട്.  

ആഗസ്റ്റ് 20 നാണ് പാലക്കാട് വ്യാസ വിദ്യാപീഠം പ്രീപ്രൈമറി സി.ബി.എസ്.ഇ സ്‌കൂളില്‍ സ്‌ഫോടനം നടന്നത്. അപകടത്തില്‍ പത്ത് വയസുകാരനും മറ്റൊരു സ്ത്രീക്കും പരിക്കേറ്റിരുന്നു. ആര്‍.എസ്.എസ് ശാഖ പതിവായി നടക്കുന്ന സ്ഥലമാണ് സ്‌കൂള്‍. സ്‌ഫോടന ദിവസവും ഇവിടെ ശാഖ നടന്നിരുന്നു. പത്തുവയസുകാരനായ വിദ്യാര്‍ഥി സ്‌കൂള്‍ കോമ്പൗണ്ടിനകത്ത് കിടന്നിരുന്ന വസ്തു പന്താണെന്ന് കരുതി തട്ടിത്തെറിപ്പിച്ചപ്പോഴാണ് വലിയ ശബ്ദത്തോടെ ഇത് പൊട്ടിത്തെറിച്ചത്. ആ സമയത്ത് കുട്ടിയുടെ കൂടെ നില്‍ക്കുകയായിരുന്നു പരുക്കേറ്റ സ്ത്രീ. 

സംഭവത്തിന് പിന്നാലെ സുരേഷിനേയും സ്‌ഫോടക വസ്തു നിര്‍മാണ തൊഴിലാളികളായ സുരേഷ്, ശശീന്ദ്രന്‍, ഉണ്ണികൃഷ്ണന്‍ എന്നിവരെ പൊലിസ് കസ്റ്റഡിയിലെടുത്തു. തുടര്‍ന്ന് സുരേഷിന്റെ വീട്ടില്‍ നടത്തിയ പരിശോധനയില്‍ 24 ഇലക്ട്രിക് ഡിറ്റനേറ്ററും അനധികൃതമായി നിര്‍മിച്ച 12 സ്ഫോടക വസ്തുക്കളും കണ്ടെത്തിയിരുന്നു. സ്‌ഫോടക വസ്തുക്കള്‍ കൃത്രിമമായി നിര്‍മിക്കാന്‍ ഉപയോഗിക്കുന്ന നൂലുകള്‍ , പ്ലാസ്റ്റിക് കവറുകള്‍ , ടാപ്പുകള്‍ എന്നിവയും പിടികൂടിയിരുന്നു.

ഡിറ്റനേറ്റര്‍ കൈവശം വെക്കാന്‍ ലൈസന്‍സ് ആവശ്യമാണ്. എന്നാല്‍ സുരേഷിന് ലൈസന്‍സ് ഇല്ലായിരുന്നു.

ALSO READ: പാലക്കാട് സ്‌കൂളിലെ സ്ഫോടനം: ബിജെപി പ്രവർത്തകന്റെ വീട്ടിൽ പരിശോധന, സ്‌ഫോടക വസ്തുക്കളുടെ ശേഖരം കണ്ടെത്തി