ദുബൈ: ഏഷ്യാ കപ്പ് ക്രിക്കറ്റിന്റെ സൂപ്പർ ഫോറിൽ ഇന്ന് സൂപ്പർ പോര്. ഗ്രൂപ്പ്ഘട്ടത്തിൽ അനായാസം തകർത്ത് വിട്ട പാകിസ്ഥാനെ ഇന്ന് വീണ്ടും ഇന്ത്യൻ ചുണക്കുട്ടികൾ നേരിടുന്നു. ഇന്ന് രാത്രി എട്ടിന് നടക്കുന്ന മത്സരത്തിലാണ് ഇന്ത്യയും പാകിസ്ഥാനും തമ്മിൽ കൊമ്പുകോർക്കുന്നത്. ഗ്രൂപ്പ് റൗണ്ടിലെ മൂന്ന് മത്സരങ്ങളിൽ ഇന്ത്യ ഒറ്റ മത്സരത്തിലും തോൽക്കാതെയായിരുന്നു സൂപ്പർ ഫോറിൽ എത്തിയതെങ്കിൽ പാകിസ്ഥാൻ ഇന്ത്യക്കെതിരേയുള്ള മത്സരത്തിൽ തോറ്റു.  അവസാന മത്സരത്തിൽ ഒമാനെ തോൽപ്പിച്ചാണ് ഇന്ത്യ വരുന്നത്. 

ഒമാനെതിരേ 21 റൺസിന്റെ ചെറിയ ജയമായിരുന്നു ഇന്ത്യ നേടിയത്. തോറ്റെങ്കിലും മത്സരത്തിൽ ഇന്ത്യയെ പ്രതിരോധത്തിലാക്കാൻ ഒമാന് കഴിഞ്ഞു. അതേസമയം യു.എ.ഇക്കെതിരേയുള്ള നിർണായക മത്സരത്തിൽ 41 റൺസിന്റെ ജയം നേടിയാണ് പാകിസ്ഥാൻ സൂപ്പർ ഫോറിൽ പ്രവേശിച്ചത്.

ALSO READ: 79 വർഷത്തെ റെക്കോർഡ് തകർത്തു; തോൽവിയിലും ചരിത്രം തിരുത്തിയെഴുതി ഒമാൻ താരം 

ഗ്രൂപ്പ്ഘട്ടത്തിൽ നടന്ന മത്സരത്തിൽ പാകിസ്ഥാനെതിരേ അനായാസ ജയം നേടിയ ഇന്ത്യ ഇന്ന് ജയിച്ച് കയറുമെന്ന് തന്നെയാണ് കരുതുന്നത്. ഏഴു  വിക്കറ്റിനായിരുന്നു അന്ന് ഇന്ത്യ പാകിസ്ഥാനെ വീഴ്ത്തിയത്. ബൗളർമാർ കൃത്യതയോടെ പന്തെറിഞ്ഞതിനാൽ ആദ്യം ബാറ്റു ചെയ്ത പാകിസ്ഥാനെ 127 റൺസ് എന്ന ചെറിയ സ്‌കോറിൽ ഒതുക്കാൻ ഇന്ത്യക്ക് കഴിഞ്ഞിരുന്നു. ബാറ്റിങ്ങിലും ഇന്ത്യ മികവ് കാട്ടിയതോടെ സമ്മർദമില്ലാതെ ജയിച്ചു കയറാൻ ഇന്ത്യൻ സംഘത്തിനായി. 

ടൂർണമെന്റിലുടനീളം നടത്തുന്ന മികച്ച പ്രകടനത്തിന്റെ ആത്മവിശ്വാസത്തിലും പാകിസ്ഥാനെതിരേയുള്ള ജയത്തിന്റെ കരുത്തിലും നീലപ്പട ഇറങ്ങുമ്പോൾ സൂപ്പർ ഫോറിലെ ആദ്യ മത്സരത്തിൽ ജയിക്കാനുറച്ചാകും ടീം എത്തുക. പാകിസ്ഥാനെതിരേയുള്ള മത്സരത്തിൽ കളിച്ച അതേ ടീം തന്നെയാകും ഇന്നത്തെ മത്സരത്തിലും കളത്തിലിറങ്ങുക. ഒമാനെതിരായ മത്സരത്തിൽ പുറത്തിരുന്ന ജസ്പ്രിത് ബുംറയും വരുൺ ചക്രവർത്തിയും ഇന്ന് ടീമിൽ തിരിച്ചെത്തും. എന്നാൽ പരുക്കേറ്റ അക്‌സർ പട്ടേൽ കളിക്കുന്ന കാര്യം സംശയത്തിലാണെന്ന് റിപ്പോർട്ടുകളുണ്ട്. അക്‌സർ കളിക്കാതിരിക്കുകയാണെങ്കിൽ പകരം ആർക്ക് നറുക്ക് വീഴുമെന്നത് പറയാനാകില്ല.

ALSO READ: ഏഷ്യാ കപ്പ് 2025: പാകിസ്ഥാൻ പിന്മാറ്റ ഭീഷണിക്ക് മുന്നിൽ എസിസി വഴങ്ങുമോ? പൈക്രോഫ്റ്റിനെ പുറത്താക്കിയില്ലെങ്കിൽ യുഎഇ മത്സരം ബഹിഷ്കരിക്കുമെന്ന് പിസിബി

മറുവശത്ത് കഴിഞ്ഞ മത്സരത്തിലെ പരാജയവും ഹസ്തദാന വിവാദവുമുണ്ടാക്കിയ നാണക്കേട് ഇന്ന് ജയത്തോടെ മായ്ക്കാനുറച്ചാവും പാക് പട ഇറങ്ങുക.  ബൗളിങ് നിര ഭേദപ്പെട്ട പ്രകടനം പുറത്തെടുക്കുന്നുണ്ടെങ്കിലും ബാറ്റിങ് നിര ദുര്‍ബലമാവുന്നതാണ് പാകിസ്ഥാന് വെല്ലുവിളിയാവുന്നത്. ബാറ്റ് കൊണ്ടും പന്ത് കൊണ്ടും നിര്‍ണായക പ്രകടനം നടത്തുന്ന ഷഹീന്‍ അഫ്രീദിയാണ് ടൂര്‍ണമെന്റില്‍ പാകിസ്ഥാനെ കുന്തമുന.  ഗ്രൂപ്പ് റൗണ്ടിലെ മൂന്ന് മത്സരത്തിലും റണ്‍സൊന്നുമെടുക്കാതെ പുറത്തായ ഓപ്പണര്‍ സെയിം അയ്യൂബിനെ ഇന്നും ടീമില്‍ നിലനിര്‍ത്തുമോ എന്നതും കണ്ടറിയണം.