ഡൽഹി: പാകിസ്ഥാൻ അധിനിവേശ കശ്മീരിലെ (POK) തെരുവുകളിൽ അണയാതെ തുടരുകയാണ് പ്രതിഷേധം. അടിസ്ഥാന അവകാശങ്ങൾക്കായുള്ള ജനകീയ പ്രക്ഷോഭത്തിൽ ഇതുവരെ ഒമ്പത് പേർക്ക് ജീവന്‍ നഷ്ടപ്പെട്ടു. പ്രതിഷേധക്കാരെ അടിച്ചമർത്താന്‍ പഞ്ചാബ് സൈന്യത്തെ വ്യോമമാര്‍ഗം വിന്യസിച്ച സർക്കാര്‍, വെടിവയ്പ്പുകളിലൂടെ ക്രൂരത നടത്തുകയാണ്. ജമ്മു കശ്മീർ ജോയിന്റ് അവാമി ആക്ഷൻ കമ്മിറ്റി (JKJAC)യും സർക്കാരും തമ്മിലുള്ള ചർച്ചകൾ പരാജയപ്പെട്ടതോടെ പ്രക്ഷോഭം വ്യാപകമായി. 38 ആവശ്യങ്ങളാണ് സംഘടന മുന്നോട്ടുവെച്ചത്, അതിൽ സർക്കാർ ഉദ്യോഗസ്ഥർക്കുള്ള പ്രത്യേക അലവൻസുകൾ അവസാനിപ്പിക്കുക, പാകിസ്ഥാനിലെ മറ്റ് ഭാഗങ്ങളിലെപ്പോലെ വൈദ്യുതി, ഗോതമ്പ് എന്നിവ കിഴിവ് നിരക്കിൽ വിതരണം ചെയ്യുക എന്നിവ ഉൾപ്പെടുന്നു.

പ്രക്ഷോഭത്തിന്റെ രക്തപാത; മരണങ്ങളും സൈനിക നടപടികളും

പഞ്ചാബിൽ നിന്ന് എത്തിച്ച സൈന്യം പ്രതിഷേധക്കാരെ നേരിടുന്നത് വെടിവയ്പ്പ് നടത്തിയാണ്. ഇത് പ്രക്ഷോഭത്തിന്‍റെ ആളികത്താൻ കാരണമായി. മുസാഫറാബാദിൽ അഞ്ച് പേരും ധീർകോട്ടിൽ അഞ്ച് പേരും ദാദ്യാൽ മേഖലയിൽ രണ്ട് പേരും കൊല്ലപ്പെട്ടു. അനൗപചാരിക റിപ്പോർട്ടുകൾ പ്രകാരം കുറഞ്ഞത് മൂന്ന് പൊലിസ് ഉദ്യോഗസ്ഥരുടെ ജീവൻ നഷ്ടപ്പെട്ടു. അടിസ്ഥാന സൗകര്യങ്ങളിലെ പോരായ്മകൾക്കും സാമ്പത്തിക ദുരിതത്തിനുമെതിരെയുള്ള ഈ പ്രക്ഷോഭം, പാകിസ്ഥാൻ അധിനിവേശ കശ്മീരിന്റെ (ആസാദ് കശ്മീർ) വിവിധ ഭാഗങ്ങളിലേക്ക് വ്യാപിച്ചു.

പ്രതിഷേധക്കാർ പാകിസ്ഥാൻ സർക്കാരും സൈന്യവും തങ്ങളുടെ വിഭവങ്ങൾ തുടർച്ചയായി കൊള്ളയടിക്കുന്നുവെന്ന് ആരോപിക്കുന്നു. സൈന്യത്തെ ഉപയോഗിച്ച് കശ്മീരികളുടെ അവകാശങ്ങൾ കവർന്നെടുക്കുകയാണെന്ന് . ജമ്മു കശ്മീർ ജോയിന്റ് അവാമി ആക്ഷൻ കമ്മിറ്റി  വ്യക്തമാക്കി. ക്രൂരമായ ബലപ്രയോഗവും മാധ്യമങ്ങളുടെ പൂർണ ബ്ലാക്കൗട്ടും ഉണ്ടായിട്ടും പ്രക്ഷോഭം അണയുന്നില്ലെന്ന് എക്സ് (മുൻ ട്വിറ്റർ) പ്ലാറ്റ്‌ഫോമിലെ നിരവധി വീഡിയോകൾ സാക്ഷ്യപ്പെടുത്തുന്നു. പ്രക്ഷോഭകർ സൈനിക ഉദ്യോഗസ്ഥരെ ആക്രമിക്കുന്നത് പകർത്തിയ വീഡിയോകളും പുറത്തുവന്നിട്ടുണ്ട്.

ഇന്ത്യയെ പഴിച്ച് ശ്രദ്ധ തിരിക്കാൻ പാകിസ്ഥാന്റെ തന്ത്രം

അതേസമയം, പ്രക്ഷോഭത്തിന്റെ ജനകീയ സ്വഭാവത്തെ മറയ്ക്കാൻ പാകിസ്ഥാൻ ഇന്ത്യയെ കുറ്റപ്പെടുത്തുകയാണ്. പിഒകെ പ്രധാനമന്ത്രി ചൗധരി അൻവർ-ഉൾ-ഹഖ് ഇന്ത്യയുടെ പേര് പരോക്ഷമായി പരാമർശിച്ച് രംഗത്തെത്തി. "ജനങ്ങളുടെ ആവശ്യങ്ങളിൽ നിന്ന് ശ്രദ്ധ തിരിക്കാൻ ശ്രമിക്കുകയാണ്. ആസാദ് കശ്മീരിൽ അക്രമം ഞങ്ങൾ ആഗ്രഹിക്കുന്നില്ല. ശത്രുവിന് അതിൽ നിന്ന് പ്രയോജനം ലഭിക്കാൻ ഞങ്ങൾ വിട്ടുകൊടുക്കില്ല," അദ്ദേഹം പറഞ്ഞു.

പ്രതിഷേധക്കാരുടെ ഭൂരിഭാഗം ആവശ്യങ്ങളും ഇതിനകം അംഗീകരിച്ചിട്ടുണ്ടെന്നും പ്രക്ഷോഭങ്ങൾ ഫലം കാണില്ലെന്നും അൻവർ-ഉൾ-ഹഖ് അവകാശപ്പെട്ടു. പാകിസ്ഥാൻ മാധ്യമങ്ങളും ഇന്ത്യയ്ക്കെതിരെ അടിസ്ഥാനരഹിതമായ ആരോപണങ്ങൾ ഉന്നയിച്ചു. പ്രതിഷേധങ്ങളെക്കുറിച്ചുള്ള "നുണകളുടെ കൊടുങ്കാറ്റ്" പുതിയതല്ലെന്നും ഇത് "ന്യൂഡൽഹിയിലെ വളരെ പഴയതും ക്ഷീണിതവുമായ ഒരു പുസ്തകത്തിലെ ഏറ്റവും പുതിയ അധ്യായം" മാത്രമാണെന്നും ഡെയിലി പാകിസ്ഥാൻ എന്ന മാധ്യമം വിമർശിച്ചു.

ഇന്ത്യയുടെ "കുപ്രസിദ്ധ രഹസ്യാന്വേഷണ ഏജൻസി"യായ റോ (റിസർച്ച് ആൻഡ് അനാലിസിസ് വിങ്)യുമായി ബന്ധപ്പെട്ട നെറ്റ്‌വർക്കുകൾ സോഷ്യൽ മീഡിയയിൽ വ്യാജ പ്രചാരണം നടത്തുന്നുവെന്ന് അവർ ആരോപിച്ചു. വ്യാജ വീഡിയോകൾ, കൃത്രിമ ചിത്രങ്ങൾ, ബന്ധമില്ലാത്ത ക്ലിപ്പിംഗുകൾ എന്നിവ പാക്കേജ് ചെയ്ത് "സായുധ കലാപത്തിന്റെ തെളിവ്" ആയി അവതരിപ്പിക്കുന്നുവെന്നും മാധ്യമങ്ങൾ പറഞ്ഞു.

പാകിസ്ഥാന്റെ ഈ ആരോപണങ്ങൾ, പ്രക്ഷോഭത്തിന്റെ യഥാർത്ഥ കാരണങ്ങളായ സാമ്പത്തിക-സാമൂഹിക പ്രശ്നങ്ങളെ മറയ്ക്കാനുള്ള ശ്രമമാണെന്ന് വിമർശകർ ചൂണ്ടിക്കാട്ടുന്നു. പിഒകെയിലെ ജനങ്ങൾ അവകാശങ്ങൾ സംരക്ഷിക്കാനുള്ള ആവശ്യം ശക്തമായി തുടരുമെന്നാണ് സൂചന.