അബൂദബി: വിമാനത്തിലെ കേടായ സീറ്റില്‍ യാത്ര ചെയ്യുന്നതിനിടെ പരിക്കേറ്റ യുവതിക്ക് നഷ്ടപരിഹാരം നല്‍കണമെന്ന് അബൂദബി കോടതി. വിമാനകമ്പനി 10,000 ദിര്‍ഹം (രണ്ടര ലക്ഷം രൂപ) നഷ്ടപരിഹാരമായി നല്‍കണമെന്നാണ് കോടതി വിധിച്ചിരിക്കുന്നത്. യുവതിക്ക് ഉണ്ടായ മാനസികവും ശാരീരികവുമായ ബുദ്ധിമുട്ട് പരിഗണിച്ചാണ് പിഴ ശിക്ഷ വിധിച്ചതെന്നും അബൂദബി ഫാമിലി കോടതി വ്യക്തമാക്കി.

ഇളകിയ നിലയിലായിരുന്നു വിമാനത്തിലെ സീറ്റ് ഉണ്ടായിരുന്നത്. യാത്രക്കാരിയായ യുവതി അത് ചൂണ്ടിക്കാണിച്ചിട്ടും മാറ്റി നല്‍കാന്‍ വിമാനത്തിലെ ജീവനക്കാര്‍ തയ്യറായതുമില്ല. യാത്രക്കിടെ സീറ്റിന്റെ ഭാഗത്ത് തട്ടി ഇവര്‍ക്ക് ദേഹത്ത് മുറിവ് ഉണ്ടാവുകയും ചെയ്തു. ലക്ഷ്യ സ്ഥാനത്ത് എത്തിയ യുവതി ഉടന്‍ തന്നെ ഒരു ക്ലിനിക്കിലേക്കു പ്രവേശിച്ചു. അവിടെ നിന്ന് പ്രാഥമിക ചികിത്സയും തേടി. പിന്നീട് യുഎഇയില്‍ മടങ്ങിയെത്തിയ യുവതി കൂടുതല്‍ ചികിത്സയ്ക്കായി ആശുപത്രിയില്‍ പ്രവേശിക്കുകയും ചെയ്തിരുന്നു.

 ALSO READ: കുതിപ്പ് തുടർന്ന് പൊന്ന്; യുഎഇയിൽ സ്വർണവില സർവകാല റെക്കോർഡിൽ

തനിക്കുണ്ടായ ബുദ്ധിമുട്ടുകള്‍ക്ക് പകരമായി 50,000 ദിര്‍ഹം നഷ്ടപരിഹാരം വേണമെന്നായിരുന്നു യുവതിയുടെ ആവശ്യം. ആശുപത്രി രേഖകള്‍ അടക്കം കോടതിയില്‍ തെളിവായി സമര്‍പ്പിക്കുകയും ചെയ്തു. കേസില്‍ വിശദമായി വാദം കേട്ട കോടതി എയര്‍ലൈന്‍ കമ്പനിയുടെ ഭാഗത്ത് നിന്നുണ്ടായ വീഴ്ച കണ്ടെത്തി. തുടര്‍ന്ന് പരാതിക്കാരിക്ക് 10,000 ദിര്‍ഹം നഷ്ടപരിഹാരം നല്‍കാനും വിധിച്ചു. എന്നാല്‍ എയര്‍ലൈന്‍ കമ്പനിയുടെ പേരോ മറ്റ് വിവരങ്ങളോ പുറത്ത് വിടാന്‍ അധികൃതര്‍ തയ്യാറായിട്ടില്ല.