പ്രസവ ശസ്ത്രക്രിയക്കിടെ യുവതി മരിച്ച സംഭവത്തില്‍ ചികിത്സാപ്പിഴവെന്ന ആരോപണവുമായി ബന്ധുക്കള്‍. കരുനാഗപ്പള്ളി താലൂക്ക് ആശുപത്രിക്കെതിരെയാണ് ആരോപണം. കൊല്ലം തേവലക്കര സ്വദേശി ജാരിയത്ത് മരിച്ചത് അനസ്തീഷ്യയിലുണ്ടായ പിഴവ് കാരണമാണെന്ന് ബന്ധുക്കള്‍ ആരോപിച്ചു. 

പ്രസവത്തെ തുടര്‍ന്ന് ഗുരുതരാവസ്ഥയിലായ യുവതിയെ  വണ്ടാനം മെഡിക്കല്‍ കോളേജ് ആശുപത്രിയില്‍ എത്തിക്കുകയായിരുന്നു. ഇവിടെവെച്ച് ഇന്ന് രാവിലെയാണ് 22കാരിയായ ജാരിയത്ത് മരിക്കുന്നത്. 

അതേസമയംസംഭവത്തില്‍ ചികിത്സാപിഴവുണ്ടായിട്ടില്ല എന്നാണ് കരുനാഗപ്പള്ളി താലൂക്ക് ആശുപത്രി അധികൃതരുടെ വിശദീകരണം. പ്രസവം സിസേറിയനായിരുന്നു. അനസ്‌തേഷ്യയ്ക്ക് ഒരു ഡോക്ടറാണ് ആശുപത്രിയില്‍ ഉള്ളത്. ഈ ഡോക്ടറുടെ അഭാവത്തിലാണ് കുണ്ടറ താലൂക്ക് ആശുപത്രിയില്‍ നിന്ന് അനസ്‌തേഷ്യ കൊടുക്കാന്‍ ഡോക്ടെ എത്തിച്ചത്. പ്രസവ ശേഷം തിയേറ്ററില്‍ നിന്ന് മാറ്റി ഒന്നര മണിക്കൂറിന് ശേഷം യുവതിയുടെ ബിപി കുറഞ്ഞു. എത്ര ശ്രമിച്ചിട്ടും സാധാരണ നിലയിലേക്ക് എത്തിയില്ല. തുടര്‍ന്ന് വണ്ടാനത്തേക്ക് റഫര്‍ ചെയ്തു. 108 ആംബുന്‍സില്‍ വണ്ടാനത്തേക്ക് കൊണ്ടു പോയി. കാര്‍ഡിയോ മയോപ്പതിയാകാം മരണ കാരണം. പോസ്റ്റ്‌മോര്‍ട്ടത്തിലേ ഇക്കാര്യം സ്ഥിരീകരിക്കാനാകൂ എന്നും ആശുപത്രി അധികൃതര്‍ പറയുന്നു.