കുവൈത്ത് സിറ്റി: രാജ്യത്തുടനീളമുള്ള മുഖ്യ വികസന പദ്ധതികളുടെ പുരോഗതി വിലയിരുത്തുന്നതിനായുള്ള 32-ാമത് മന്ത്രിതല തുടർനടപടി സമിതി യോഗം ബയാൻ പാലസിൽ നടന്നു. പ്രധാനമന്ത്രി ഷെയ്ഖ് അഹമ്മദ് അൽ-അബ്ദുല്ല അൽ-അഹ്മദ് അൽ-സബാഹ് യോഗത്തിന് അധ്യക്ഷത വഹിച്ചു. യോഗത്തിൽ സംസാരിച്ച പ്രധാനമന്ത്രി, നിക്ഷേപം, സാമ്പത്തികം, വാണിജ്യം, വ്യവസായം തുടങ്ങിയ മേഖലയിലെ സഹകരണം കൂടുതൽ വിപുലപ്പെടുത്തുകയെന്നത് കുവൈത്തിന്റെ പ്രധാന ലക്ഷ്യമാണെന്ന് വ്യക്തമാക്കി. തന്ത്രപരമായ പങ്കാളിത്തം പങ്കിടുന്ന രാജ്യങ്ങളുമായുള്ള ബന്ധം ശക്തിപ്പെടുത്തുമെന്ന് അദ്ദേഹം ഉറപ്പു നൽകി.

ജനുവരി പ്രാരംഭത്തിൽ പീപ്പിൾസ് റിപ്പബ്ലിക് ഓഫ് ചൈനയുടെ വൈസ് പ്രസിഡന്റും ഉയർന്നതല പ്രതിനിധി സംഘവും കുവൈത്തെ ഔദ്യോഗികമായി സന്ദർശിക്കും. ഈ സന്ദർശനം വഴി ഇരുരാജ്യങ്ങൾ തമ്മിലുള്ള തന്ത്രപരമായ ബന്ധങ്ങളുടെ പുരോഗതി അവലോകനം ചെയ്യുക, നിലവിലുള്ള കരാറുകളും ധാരണാപത്രങ്ങളും നടപ്പിലാക്കുന്നതിൽ ഏകോപനം വർദ്ധിപ്പിക്കുക, സാമ്പത്തികവും നിക്ഷേപ ബന്ധങ്ങളും ഉയർന്നതലത്തിലേക്ക് ഉയർത്തുക എന്നീ ലക്ഷ്യങ്ങൾ മുൻനിർത്തി കൂടിക്കാഴ്ചകൾ നടക്കുമെന്ന് പ്രധാനമന്ത്രി അറിയിച്ചു. അമീർ ഷെയ്ഖ് മെഷാൽ അൽ-അഹ്മദ് അൽ-ജാബർ അൽ-സബാഹിന്റെ സമഗ്ര വികസനം യാഥാർത്ഥ്യമാക്കാൻ ശക്തമായ ശ്രമങ്ങൾ ആവശ്യമാണെന്ന് യോഗത്തിൽ ഊന്നിപ്പറഞ്ഞു. സമയബന്ധിതമായി വികസനപദ്ധതികൾ പൂർത്തിയാക്കുക, സാമ്പത്തിക വൈവിധ്യവൽക്കരണം ഉറപ്പാക്കുക, ഉയർന്ന സാധ്യതയുള്ള പുതിയ മേഖലകൾ വികസിപ്പിക്കുക എന്ന മേഖലകളിൽ സമിതി കൂടുതൽ സജീവമായി പ്രവർത്തിക്കണമെന്ന് പ്രധാനമന്ത്രി നിർദേശം നൽകി.

ഏഷ്യൻ കാര്യങ്ങളുടെ അസിസ്റ്റന്റ് വിദേശകാര്യ മന്ത്രിയും മന്ത്രിതല സമിതിയുടെ റിപ്പോർട്ടറുമായ അംബാസഡർ സമീഹ് ജോഹർ ഹയാത്ത്, മുതിർന്ന സർക്കാർ ഉദ്യോഗസ്ഥരും സന്ദർശനത്തിനെത്തിയ കമ്പനി പ്രതിനിധികളും തമ്മിൽ സംയുക്ത വികസന പദ്ധതികളുടെ നടത്തിപ്പിലെ സഹകരണവും പുരോഗതിയും സംബന്ധിച്ച തുടർനടപടികൾക്കായി നടത്തിയ കൂടിക്കാഴ്ചകളുടെ ഫലങ്ങളെക്കുറിച്ചുള്ള റിപ്പോർട്ട് അവതരിപ്പിച്ചു. പ്രധാനമന്ത്രിയുടെ ദിവാൻ മേധാവി അബ്ദുൽ അസീസ് ദഖിൽ അൽ-ദഖിൽ, പ്രതിരോധ മന്ത്രി ഷെയ്ഖ് അബ്ദുല്ല അലി അബ്ദുല്ല അൽ-സലേം അൽ-സബാഹ്, മുനിസിപ്പൽ കാര്യ സഹമന്ത്രിയും ഭവന കാര്യ സഹമന്ത്രിയുമായ അബ്ദുല്ലത്തീഫ് ഹമീദ് അൽ-മെഷാരി, വൈദ്യുതി, ജലം, പുനരുപയോഗ ഊർജ്ജ മന്ത്രി, ധനകാര്യ മന്ത്രിയും സാമ്പത്തിക കാര്യ, നിക്ഷേപ ആക്ടിംഗ് സഹമന്ത്രിയുമായ ഡോ. സബീഹ് അബ്ദുൽ അസീസ് അൽ-മുഖൈസീം, കുവൈറ്റ് ഡയറക്ട് ഇൻവെസ്റ്റ്‌മെന്റ് പ്രൊമോഷൻ അതോറിറ്റി ഡയറക്ടർ ജനറൽ ഷെയ്ഖ് ഡോ. മെഷാൽ ജാബർ അൽ-അഹ്മദ് അൽ-സബാഹ്, ഫത്‌വ, നിയമനിർമ്മാണ വകുപ്പ് മേധാവി കൗൺസിലർ സലാഹ് അതീഖ് അൽ-മജീദ്, അംബാസഡർ സമീഹ് ജോഹർ ഹയാത്ത് എന്നിവർ യോഗത്തിൽ പങ്കെടുത്തു. — KUNA

Ministerial committee meets to discuss major development projects in Kuwait