ഇടുക്കി: ഇടുക്കി അടിമാലിയില്‍ ദേശീയ പാതയുടെ നിര്‍മ്മാണത്തിനിടെ മണ്ണിടിച്ചിലില്‍ മരണപ്പെട്ട ബിജുവിന്റെ മകളുടെ പഠനച്ചെലവ് കോളജ് ഏറ്റെടുക്കും. ബിജുവിന്റെ മകള്‍ പഠിക്കുന്ന 
കോട്ടയത്ത് കങ്ങഴ  തെയോഫിലോസ് നഴ്‌സിംഗ് കോളജ് അധികൃതര്‍ ഇക്കാര്യം അറിയിച്ചതായി ആരോഗ്യമന്ത്രി വീണാ ജോര്‍ജ് പറഞ്ഞു. 

ഇവിടെ രണ്ടാം വര്‍ഷ വിദ്യാര്‍ഥിനിയാണ് ബിജുവിന്റെ മകള്‍. കോളേജിന്റെ ചെയര്‍മാന്‍ ശ്രീ ജോജി തോമസുമായി
വീണാ ജോര്‍ജ് സംസാരിച്ചു. കോഴ്‌സ് പൂര്‍ത്തീകരിക്കുന്നതിനായി ആ മകളുടെ തുടര്‍ വിദ്യാഭ്യാസ ചിലവുകള്‍, പഠന ഫീസും ഹോസ്റ്റല്‍ ഫീസുമടക്കം എല്ലാം കോളേജ് ഏറ്റെടുക്കാമെന്ന് അദ്ദേഹം മന്ത്രിയെ അറിയിച്ചു. 

ജോജി തോമസിനോട് മന്ത്രി പ്രത്യേകം നന്ദി അറിയിച്ചു. ബിജുവിന്റെ കുടുംബത്തിന്റെ ദുഖത്തില്‍ പങ്കുചേരുകയും അനുശോചനം അറിയിക്കുകയും ചെയ്യുന്നതായും മന്ത്രി പറഞ്ഞു. 

ALSO READ: സര്‍ട്ടിഫിക്കറ്റുകളെടുക്കാനായുള്ള വരവ് മരണത്തിലേക്ക്; മണ്ണിടിച്ചില്‍ മരിച്ച ബിജുവിന്റെ സംസ്‌ക്കാരം ഉച്ചകഴിഞ്ഞ്

അടിമാലിയിലെ അപകടത്തില്‍ കൂമ്പന്‍പാറ ലക്ഷം വീട് നിവാസിയായ ബിജുവാണ് മരിച്ചത്. ഗുരുതര പരിക്കേറ്റ ഭാര്യ സന്ധ്യ രാജഗിരി ആശുപത്രിയില്‍ ചികിത്സയിലാണ്. ആറര മണിക്കൂര്‍ നീണ്ട രക്ഷാപ്രവര്‍ത്തനത്തിന് ശേഷമാണ് ബിജുവിനെ പുറത്തെടുത്തത്. സന്ധ്യയുടെ കാലിനാണ് പരുക്കേറ്റത്.

സര്‍ട്ടിഫിക്കറ്റുകളെടുക്കാനായി തിരിച്ചുവന്നപ്പോഴാണ് ബിജുവും സന്ധ്യയും അപകടത്തില്‍പെട്ടതെന്ന് സന്ധ്യയുടെ പിതാവ് പറഞ്ഞു. മണ്ണിടിച്ചിലിന് സാധ്യതയുണ്ടെന്ന മുന്നറിയിപ്പ് ലഭിച്ചതോടെ മാറിത്താമസിച്ചിരുന്നുവെങ്കിലും സര്‍ട്ടിഫിക്കറ്റുകളെടുക്കാനായി ഇവര്‍ തിരിച്ചുവരികയായിരുന്നു. പ്രതീക്ഷിതമായ ദുരന്തമായിരുന്നുവെന്നും മകള്‍ വീട്ടിലില്ലാതിരുന്നതിനാല്‍ രക്ഷപ്പെട്ടുവെന്നും പിതാവ് പറഞ്ഞു.

അടിമാലി കൂമ്പന്‍പാറയില്‍ തീവ്രമായ മണ്ണിടിച്ചിലാണ് ഇന്നലെ രാത്രി ഉണ്ടായത്. ലക്ഷംവീട് ഉന്നതി കോളനിയിലെ വീടുകള്‍ക്ക് മുകളിലേക്ക് മണ്ണിടിഞ്ഞ് വീണാണ് അപകടമുണ്ടായത്. മണ്ണിടിച്ചില്‍ ഭീഷണിയെത്തുടര്‍ന്ന് 22 കുടുംബങ്ങളെ ഇന്നലെ രാവിലെ തന്നെ മാറ്റിപ്പാര്‍പ്പിച്ചതിനാല്‍ വന്‍ ദുരന്തം ഒഴിവാകാാന്‍ കഴിഞ്ഞെങ്കിലും നിരവധി വീടുകള്‍ മണ്ണിനടിയിലായ അവസ്ഥയിലാണ്. എന്നാല്‍, തകര്‍ന്ന വീടുകളില്‍ സാധനങ്ങള്‍ എടുക്കാന്‍ എത്തിയ ദമ്പതികളില്‍ ഒരാള്‍ മണ്ണിനടിയില്‍പ്പെട്ട് മരിക്കുകയും ചെയ്തു.

English Summary: In Idukki’s Adimali, following the tragic landslide that occurred during national highway construction and claimed the life of Biju, the college where his daughter studies has stepped forward to support her education. Theophilos College of Nursing in Kangazha, Kottayam, announced that it will cover all expenses related to Biju’s daughter’s studies, including tuition and hostel fees.