പാലക്കാട്: മാത്തൂർ പല്ലഞ്ചാത്തനൂരിൽ കുടുംബവഴക്കിനെത്തുടർന്ന് ഭർത്താവ് ഭാര്യയെ കൊടുവാൾ കൊണ്ട് വെട്ടിക്കൊന്നു. മാത്തൂർ പല്ലഞ്ചാത്തനൂർ പൊള്ളംപാടം വീട്ടിൽ ഇന്ദിര (55) ആണ് കൊല്ലപ്പെട്ടത്. ഭർത്താവ് വാസു (62) ആണ് കൊലപാതകം നടത്തിയത്. ബുധനാഴ്ച രാവിലെ പത്ത് മണിയോടെയാണ് നാടിനെ നടുക്കിയ ഈ സംഭവം നടന്നത്.

ബുധനാഴ്ച രാവിലെ ഏകദേശം 10 മണിയോടെ വീട്ടിൽ നിന്ന് നിലവിളി കേട്ടതിനെ തുടർന്ന് അയൽവാസിയായ രാജൻ ഓടിയെത്തുകയായിരുന്നു.വീടിൻ്റെ അടുക്കള ഭാഗത്ത് ഇന്ദിരയെ മരിച്ച നിലയിൽ കണ്ടെത്തി.വീടിൻ്റെ മുൻവശത്ത് കൊടുവാളുമായി വാസു നിൽപ്പുണ്ടായിരുന്നു. അയൽവാസി വാസുവിൻ്റെ കൈയിൽ നിന്ന് കൊടുവാൾ പിടിച്ചുവാങ്ങി.

കൊലപാതക കാരണം:

കുടുംബവഴക്കാണ് കൊലപാതകത്തിലേക്ക് നയിച്ചതെന്ന് പൊലിസ് അറിയിച്ചു.ഭാര്യയും മക്കളും ചേർന്ന് തന്നെ കുറ്റപ്പെടുത്തുന്നതായി വാസു ആരോപിച്ചിരുന്നു.ചൊവ്വാഴ്ച രാത്രി ഇന്ദിരയും വാസുവും തമ്മിൽ വാക്കുതർക്കം ഉണ്ടായി.ബുധനാഴ്ച രാവിലെ മക്കൾ ജോലിക്ക് പോയ ശേഷം ഇരുവരും തമ്മിൽ വീണ്ടും വാക്കുതർക്കം ഉണ്ടാകുകയും, ഇതിൽ പ്രകോപിതനായ വാസു കൊടുവാളെടുത്ത് ഇന്ദിരയെ വെട്ടിക്കൊലപ്പെടുത്തുകയുമായിരുന്നു.സംഭവത്തിൽ പൊലിസ് അന്വേഷണം ആരംഭിച്ചു.