ചെന്നൈ: പാര്‍ട്ടി സ്ഥാപകനും നടനുമായ വിജയ് യെ 2026 ലെ തമിഴ്‌നാട് നിയമസഭാ തെരഞ്ഞടുപ്പിലെ മുഖ്യമന്ത്രി സ്ഥാനാര്‍ഥിയായി പ്രഖ്യാപിച്ച് ടി.വി.കെ. മഹാബലിപുരത്ത് നടന്ന ടി.വി.കെ ജനറല്‍ കൗണ്‍സില്‍ യോഗത്തിലാണ് തീരുമാനം. തെരഞ്ഞെടുപ്പില്‍ സഖ്യമില്ലെന്നുംഡി.എം.കെയുമായി നേര്‍ക്കുനേര്‍ ഏറ്റുമുട്ടുമെന്നും വിജയ് പ്രഖ്യാപിച്ചു.  വിജയ് യുടെ പാര്‍ട്ടിയുമായി സഖ്യത്തിലാകാനുള്ള എ.ഐ.ഡി.എം.കെയുടെ മോഹങ്ങള്‍ക്കും ഇതോടെ അവസാനമായി. 

കരൂരില്‍ മരിച്ചവര്‍ക്ക് അനുശോചനം അര്‍പ്പിച്ചുകൊണ്ടാണ് വിജയ് യോഗത്തില്‍ സംസാരിച്ചുതുടങ്ങിയത്. 'കരൂരിലെ തിക്കിലും തിരക്കിലുംപെട്ട് നമ്മുടെ കുടുംബാംഗങ്ങളെ നഷ്ടപ്പെട്ടതില്‍ പറഞ്ഞറിയിക്കാനാവാത്ത വേദനയിലാണ്. ഞങ്ങള്‍ക്കെതിരെ ഒരുപാട് തെറ്റായ വിവരങ്ങളും അപവാദപ്രചാരണങ്ങളുമുണ്ടായി. സത്യവും നിയമവും കൊണ്ട് നമ്മള്‍ എല്ലാം നേടിയെടുക്കും.' വിജയ് പറഞ്ഞു. 

ALSO READ: 'ഹരിയാനയിലെ പത്ത് ബൂത്തുകളിലായി 22 വോട്ടുകള്‍' ആരാണ് രാഹുല്‍ ഗാന്ധി തുറന്ന 'H' ഫയല്‍സിലെ ബ്രസീലിയന്‍ മോഡല്‍?

കോയമ്പത്തൂരില്‍ കോളജ് വിദ്യാര്‍ഥിനിയെ കൂട്ടബലാത്സംഗത്തിനിരയാക്കിയ സംഭവത്തെ വിജയ് അപലപിച്ചു. തമിഴ്‌നാട്ടില്‍ ക്രമസമാധാനം തകര്‍ന്നിരിക്കുകയാണെന്നും എവിടെയാണ് കുട്ടികള്‍ക്കും സ്ത്രീകള്‍ക്കും സുരക്ഷയുള്ളതെന്നും വിജയ് ചോദിച്ചു. മുഖ്യമന്ത്രി എം.കെ സ്റ്റാലിന്‍ ഉറക്കത്തില്‍ നിന്ന് എപ്പോള്‍ ഉണരുമെന്നും അദ്ദേഹം ചോദിച്ചു. 

''ജനങ്ങള്‍ക്ക് ഡി.എം.കെ സര്‍ക്കാരിലുള്ള വിശ്വാസം നഷ്ടപ്പെട്ടു. ഈ സംസ്ഥാനത്തെ ജനങ്ങളുടെ വികാരം മുഖ്യമന്ത്രിക്കറിയാമോ? അറിയില്ലെങ്കില്‍, 2026-ലെ തെരഞ്ഞെടുപ്പില്‍ അദ്ദേഹം അത് അറിയും''- വിജയ് കൂട്ടിച്ചേര്‍ത്തു.

English Summary: Actor and Tamilaga Vettri Kazhagam (TVK) founder Vijay has been officially declared as the party’s Chief Minister candidate for the 2026 Tamil Nadu Assembly elections. The decision was announced during the party’s General Council meeting held in Mahabalipuram. Vijay also confirmed that TVK will contest the elections independently, without forming alliances, directly challenging the ruling DMK.