ദുബൈ: അമേരിക്കയിൽ നിന്ന് പുറപ്പെടുന്ന തങ്ങളുടെ യാത്രക്കാർക്ക് മുന്നറിയിപ്പുമായി എമിറേറ്റ്സ്. വിമാനത്താവളങ്ങളിലെ സുരക്ഷാ പരിശോധനകൾക്ക് സാധാരണയേക്കാൾ കൂടുതൽ സമയമെടുക്കുന്ന സാഹചര്യത്തിൽ, വിമാനം പുറപ്പെടുന്നതിന് നാല് മണിക്കൂർ മുമ്പെങ്കിലും വിമാനത്താവളത്തിൽ എത്തണമെന്ന് എയർലൈൻ യാത്രക്കാരോട് ആവശ്യപ്പെട്ടു.

മുന്നറിയിപ്പിനുള്ള കാരണങ്ങള്‍

സുരക്ഷാ പരിശോധനകളിലെ കാലതാമസം: യു.എസ്. വിമാനത്താവളങ്ങളിൽ നിലനിൽക്കുന്ന ജീവനക്കാരുടെ കുറവടക്കമുള്ള പ്രശ്നങ്ങളെ തുടർന്ന് നിലവിൽ സുരക്ഷാ പരിശോധനകൾക്ക് കൂടുതൽ സമയം ആവശ്യമായി വരുന്നുണ്ട്. 

യു.എസ് ഗവൺമെന്റ് ഷട്ട്ഡൗൺ: 41-ാം ദിവസത്തിലേക്ക് കടന്ന ഗവൺമെന്റ് ഷട്ട്ഡൗൺ ആണ് ഈ തടസ്സങ്ങൾക്ക് പ്രധാന കാരണം.

എയർ ട്രാഫിക് കൺട്രോളർമാരുടെ ക്ഷാമം: രാജ്യത്തെ വ്യോമ ​ഗതാ​ഗതം നിയന്ത്രിക്കുന്ന എയർ ട്രാഫിക് കൺട്രോളർമാർ 'അവശ്യ ജീവനക്കാർ എന്ന വിഭാ​ഗത്തിൽ ഉൾപെടുന്നവരാണ്. അതിനാൽ, ഷട്ട്ഡൗൺ കാലത്ത് ഇവർ ശമ്പളമില്ലാതെ ജോലി ചെയ്യേണ്ടതായി വരുന്നു. ശമ്പളമില്ലാതെ ജോലി ചെയ്യുന്നതിന്റെ അധിക ജോലിഭാരവും, സമ്മർദ്ദവും കാരണം ജീവനക്കാർ ജോലിക്കെത്താതിരിക്കുന്നത് വിമാനത്താവളങ്ങളിൽ ജീവനക്കാരുടെ വലിയ കുറവുണ്ടാക്കുന്നു.

വിമാനങ്ങൾ വെട്ടിച്ചുരുക്കൽ: 10 ശതമാനത്തോളം ആഭ്യന്തര സർവിസുകൾ വെട്ടിക്കുറക്കാൻ ഫെഡറൽ ഏവിയേഷൻ അഡ്മിനിസ്‌ട്രേഷൻ (FAA) എയർലൈനുകളോട് ആവശ്യപ്പെട്ടിട്ടുണ്ട്. എയർ ട്രാഫിക് കൺട്രോളർമാരുടെ ക്ഷാമം കാരണം സുരക്ഷാ പ്രശ്നങ്ങൾ വർധിക്കുന്നത് കണക്കിലെടുത്താണ് ഈ തീരുമാനം.

എമിറേറ്റ്സ് നിർദ്ദേശങ്ങൾ

നാല് മണിക്കൂർ മുമ്പ് വിമാനത്താവളത്തിൽ എത്തുക: ന്യൂയോർക്ക്, ലോസ് ആഞ്ചലസ്, ബോസ്റ്റൺ, ഷിക്കാഗോ, ഡാലസ്, ഹ്യൂസ്റ്റൺ, മിയാമി, ഒർലാൻഡോ, സാൻ ഫ്രാൻസിസ്കോ, സിയാറ്റിൽ, വാഷിംഗ്ടൺ ഡി.സി. എന്നിവിടങ്ങളിൽ നിന്ന് യാത്ര ചെയ്യുന്നവർക്കാണ് ഈ നിർദ്ദേശം.

വിവരങ്ങൾ കൃത്യമാണെന്ന് ഉറപ്പാക്കുക: യാത്രയെക്കുറിച്ചുള്ള കൃത്യമായ വിവരങ്ങൾക്ക് യാത്രക്കാർ തങ്ങളുടെ കോൺടാക്റ്റ് വിവരങ്ങൾ എയർലൈനിന്റെ 'Manage Your Booking' പോർട്ടലിൽ അപ്ഡേറ്റ് ചെയ്യണം.

Emirates Airlines has warned passengers departing from the US to arrive at the airport at least four hours before their flight due to increased security checks, which are taking longer than usual.