റിയാദ്: നവംബർ 13 വ്യാഴാഴ്ച രാജ്യമെമ്പാടും മഴ തേടിയുള്ള (ഇസ്തിസ്ഖ) നിസ്കാരം നടത്താൻ സഊദി ഭരണാധികാരി സൽമാൻ രാജാവ് ആഹ്വാനം ചെയ്തു. മഴ തേടിയുള്ള പ്രാർത്ഥന നടത്തണമെന്ന പ്രവാചകൻ മുഹമ്മദ് നബി (സ) യുടെ പാരമ്പര്യത്തെ (സുന്നത്ത്) അടിസ്ഥാനമാക്കിയാണ് മഴയെത്തേടിയുള്ള നിസ്കാരം നടത്താൻ ആഹ്വാനം ചെയ്തത്, സഊദി പ്രസ് ഏജൻസി നടത്തിയ പ്രസ്താവനയിൽ റോയൽ കോർട്ട് പറഞ്ഞു.

വിശ്വാസികൾ അല്ലാഹുവിലേക്ക് പശ്ചാത്താപിച്ച് മടങ്ങണമെന്നും പാപമോചനം തേടാനും, ആഹ്വാനം ചെയ്ത രാജാവ് ദൈവ കരുണക്കായി പ്രാർത്ഥനകളിൽ സർവ്വശക്തനായ ദൈവത്തിലേക്ക് തിരിയണമെന്നും അഭ്യർത്ഥിച്ചു. ദാനധർമ്മം, പ്രാർത്ഥനകൾ എന്നിവ പോലുള്ള  ആരാധനാക്രമങ്ങൾ വർദ്ധിപ്പിക്കേണ്ടതിന്റെ ആവശ്യകതയും അദ്ദേഹം അടിവരയിട്ടു.

"ആളുകളുടെ ഭാരങ്ങൾ ലഘൂകരിക്കാനും അവരുടെ ദുരിതങ്ങൾ ലഘൂകരിക്കാനും വിശ്വാസികൾ പരിശ്രമിക്കണം, അങ്ങനെ ദൈവം നമ്മുടെ ബുദ്ധിമുട്ടുകൾ ലഘൂകരിക്കുകയും നമ്മൾ പ്രതീക്ഷിക്കുന്നത് നൽകുകയും ചെയ്യും," രാജ്യത്തോടും ജനങ്ങളോടും കരുണ കാണിക്കാൻ ദൈവത്തോട് പ്രാർത്ഥിക്കവേ രാജാവ് പറഞ്ഞു.