ദുബൈ: യുഎഇയുടെ വിവിധ ഭാഗങ്ങളിൽ കനത്ത മൂടൽമഞ്ഞ് വ്യാപിച്ചതിനെത്തുടർന്ന് ദുബൈ അന്താരാഷ്ട്ര വിമാനത്താവളത്തിന്റെ (DXB) രാവിലെയുള്ള സർവീസുകൾ തടസ്സപ്പെട്ടു. ദൃശ്യപരത കുത്തനെ കുറഞ്ഞതോടെ ഇന്നു പുലർച്ചെ മുതൽ 19 വിമാനങ്ങളാണ് അടുത്തുള്ള വിമാനത്താവളങ്ങളിലേക്ക് വഴിതിരിച്ചുവിട്ടത്.

പ്രാദേശിക സമയം രാവിലെ 9 മണി വരെയാണ് DXB യുടെ പ്രവർത്തനത്തെ മൂടൽമഞ്ഞ് സാരമായി ബാധിച്ചത്. യാത്രക്കാർക്കുണ്ടായ അസൗകര്യം എത്രയും വേഗം പരിഹരിക്കുന്നതിനായി എയർലൈനുകൾ, നിയന്ത്രണ അധികാരികൾ, മറ്റ് പങ്കാളികൾ എന്നിവരുമായി ചേർന്ന് പ്രവർത്തിക്കുകയാണെന്ന് ദുബൈ എയർപോർട്ട്‌സ് പ്രസ്താവനയിൽ അറിയിച്ചു.

വിമാനത്താവളത്തിലേക്ക് പുറപ്പെടുന്നതിന് മുൻപ് യാത്രക്കാർ തങ്ങളുടെ എയർലൈനുകളുമായി ബന്ധപ്പെട്ട് ഫ്ലൈറ്റ് വിവരങ്ങൾ കൃത്യമായി പരിശോധിച്ച് ഉറപ്പുവരുത്തണമെന്ന് അധികൃതർ നിർദ്ദേശിച്ചു.

ALSO READ: കനത്ത മൂടൽമഞ്ഞ്; ഷാർജ എയർപോർട്ടിൽ നിന്നുള്ള നിരവധി വിമാനങ്ങൾ റദ്ദാക്കി 

ഷാർജ വിമാനത്താവളത്തിലും തടസ്സം

ദുബൈയ്ക്ക് പുറമേ ഷാർജ അന്താരാഷ്ട്ര വിമാനത്താവളത്തിലെ ഷെഡ്യൂൾ ചെയ്ത നിരവധി സർവീസുകളെയും അസ്ഥിരമായ കാലാവസ്ഥ ബാധിച്ചു. ഫ്ലൈറ്റ് ഷെഡ്യൂളുകളിലെ മാറ്റങ്ങളെക്കുറിച്ച് വിമാനക്കമ്പനികളുമായി ബന്ധപ്പെട്ട് അപ്‌ഡേറ്റ് ചെയ്യണമെന്ന് ഷാർജ വിമാനത്താവളം യാത്രക്കാർക്ക് മുന്നറിയിപ്പ് നൽകി. പല വിമാനങ്ങളും റദ്ദാക്കുകയോ വൈകുകയോ ചെയ്തിട്ടുണ്ട്. യാത്രക്കാർ ഫ്ലൈറ്റ് സ്റ്റാറ്റസ് സ്ഥിരീകരിക്കാതെ വിമാനത്താവളത്തിലേക്ക് പോകുന്നത് ഒഴിവാക്കണമെന്നും വിമാനത്താവളം ആവശ്യപ്പെട്ടു.

റെഡ് അലേർട്ട്

ദുബൈ, അബൂദബി, ഷാർജ, അജ്മാൻ ഉൾപ്പെടെയുള്ള എമിറേറ്റുകളിൽ കനത്ത മൂടൽമഞ്ഞിനെ തുടർന്ന് നാഷണൽ സെന്റർ ഓഫ് മെറ്റീരിയോളജി (NCM) റെഡ് അലേർട്ട് പ്രഖ്യാപിച്ചു. പല പ്രദേശങ്ങളിലും ദൃശ്യപരത 500 മീറ്ററിൽ താഴെയായി കുറഞ്ഞതായി റിപ്പോർട്ടുണ്ട്. അർദ്ധരാത്രിക്ക് ശേഷമാണ് NCM ആദ്യ മുന്നറിയിപ്പ് നൽകിയത്. റോഡ് ഗതാഗതത്തെയും വിമാന പ്രവർത്തനങ്ങളെയും മൂടൽമഞ്ഞ് കാര്യമായി ബാധിച്ചു.

dense fog in dubai has caused major disruptions to air travel, leading to the diversion of 19 flights. authorities advise passengers to check updated flight schedules and stay informed about weather-related delays.