പാനിപ്പത്ത്: തന്നെക്കാൾ സൗന്ദര്യമുള്ള മറ്റാരും ഉണ്ടാകരുത് എന്ന വിചിത്രമായ ചിന്തയെ തുടർന്ന് ആറ് വയസ്സുള്ള മരുമകളെ കൊലപ്പെടുത്തിയ കേസിൽ യുവതി അറസ്റ്റിൽ. ഹരിയാനയിലെ പാനിപ്പത്തിൽ നടന്ന ഈ ഞെട്ടിക്കുന്ന സംഭവത്തിൽ, പ്രതിയായ പൂനം എന്ന യുവതി വിവാഹ ചടങ്ങുകൾക്കായി കുടുംബാംഗങ്ങൾ ഒത്തുകൂടിയ സമയത്താണ് കൊലപാതകം നടത്തിയത്. യുവതി നേരത്തെ സ്വന്തം മകൻ ഉൾപ്പെടെ മൂന്ന് കുട്ടികളെയും സമാനമായ രീതിയിൽ കൊലപ്പെടുത്തിയിട്ടുണ്ടെന്ന് പൊലിസ് വെളിപ്പെടുത്തി.

 കൊലപാതകത്തിലേക്ക് നയിച്ചത്

വിവാഹത്തിൽ പങ്കെടുക്കാൻ സോനിപ്പത്തിൽ താമസിക്കുന്ന വിധി എന്ന കുട്ടിയും കുടുംബവും പാനിപ്പത്തിലെ ഇസ്രാന ഏരിയയിലുള്ള നൗൽത്ത ഗ്രാമത്തിലെ ബന്ധുവിന്റെ വീട്ടിലെത്തിയതായിരുന്നു. തിങ്കളാഴ്ച ഉച്ചയ്ക്ക് 1.30-ഓടെ വിവാഹ ഘോഷയാത്ര എത്തിയപ്പോൾ കുടുംബാംഗങ്ങൾ അതിനൊപ്പം ചേർന്നു.

തുടർന്ന് വിധിയെ കാണാനില്ലെന്ന് പറഞ്ഞ് അച്ഛന് ഫോൺ സന്ദേശം ലഭിച്ചു. കുടുംബം നടത്തിയ തിരച്ചിലിനൊടുവിൽ ഒരു മണിക്കൂറിന് ശേഷം വിധിയുടെ മുത്തശ്ശി ഓംവതി ബന്ധുവിന്റെ വീടിന്റെ ഒന്നാം നിലയിലെ സ്റ്റോർ റൂമിൽ നോക്കി. പുറത്തുനിന്ന് താഴിട്ടിരുന്ന സ്റ്റോർ റൂമിന്റെ വാതിൽ തുറന്നപ്പോൾ, വിധി ഒരു വെള്ളത്തൊട്ടിയിൽ തല മാത്രം മുങ്ങിയ നിലയിൽ കാലുകൾ നിലത്തുവെച്ച് കിടക്കുന്നതായി കണ്ടെത്തുകയായിരുന്നു. ഉടൻ തന്നെ എൻസി മെഡിക്കൽ കോളേജിൽ എത്തിച്ചെങ്കിലും ഡോക്ടർമാർ മരണം സ്ഥിരീകരിച്ചു.കുട്ടി കൊല്ലപ്പെട്ടതാണെന്ന് ആരോപിച്ച് കുട്ടിയുടെ അച്ഛൻ പൊലിസിൽ എഫ്ഐആർ രജിസ്റ്റർ ചെയ്തു. പൊലിസ് നടത്തിയ അന്വേഷണത്തിലാണ് പൂനമാണ് കൊലപാതകത്തിന് പിന്നിലെന്ന് കണ്ടെത്തിയത്.

 ഞെട്ടിക്കുന്ന കുറ്റസമ്മതം

അസൂയയും വിദ്വേഷവുമാണ് പൂനത്തെ ഈ ക്രൂരകൃത്യങ്ങൾക്ക് പ്രേരിപ്പിച്ചതെന്ന് പൊലിസ് പറഞ്ഞു. തന്നേക്കാൾ സൗന്ദര്യമുള്ള ആരും ഉണ്ടാകരുത് എന്ന ചിന്തയാണ് കുട്ടികളെ മുക്കിക്കൊല്ലുന്ന രീതിയിലേക്ക് ഇവരെ നയിച്ചത്. പ്രത്യേകിച്ച്, ചെറുപ്പവും സൗന്ദര്യവുമുള്ള പെൺകുട്ടികളെയാണ് ഇവർ ലക്ഷ്യമിട്ടിരുന്നത്.

പൂനം സമാന സാഹചര്യങ്ങളിൽ നാല് കുട്ടികളെ മുക്കിക്കൊന്നതായി സമ്മതിച്ചു. ഇതിൽ മൂന്ന് പെൺകുട്ടികളും പൂനത്തിന്റെ സ്വന്തം മകനും ഉൾപ്പെടുന്നു.

• 2023: പൂനം തന്റെ സഹോദരന്റെ മകളെ കൊന്നു.
• 2023: സംശയം ഒഴിവാക്കാനായി സ്വന്തം മകനെയും ഇതേ രീതിയിൽ വെള്ളത്തിൽ മുക്കിക്കൊന്നു.
• 2024 ഓഗസ്റ്റ്: തന്നേക്കാൾ സൗന്ദര്യമുള്ളത്തിനാൽ സിവാ ഗ്രാമത്തിലെ മറ്റൊരു പെൺകുട്ടിയെ പൂനം കൊലപ്പെടുത്തി.

ഈ കൊലപാതക പരമ്പരയുടെ കൂടുതൽ വിവരങ്ങൾ പൊലിസ് ശേഖരിച്ചു വരികയാണ്.