തെഹ്‌റാന്‍: മേഖലയിലെ അയല്‍രാജ്യങ്ങളുമായി തങ്ങള്‍ക്ക് ശത്രുതയില്ലെന്നും അവര്‍ക്ക് നേരെ ഇനിയൊരു ആക്രമണം ഇറാന്റെ ഭാഗത്തുനിന്ന് ഉണ്ടാകില്ലെന്നും പ്രസിഡന്റ് മസൂദ് പെസെഷ്‌കിയന്‍ വ്യക്തമാക്കി. കഴിഞ്ഞ ദിവസങ്ങളില്‍ അയല്‍രാജ്യങ്ങളിലുണ്ടായ മിസൈല്‍ ആക്രമണങ്ങളില്‍ അദ്ദേഹം ഖേദം പ്രകടിപ്പിക്കുകയും മാപ്പുചോദിക്കുകയും ചെയ്തു. അല്‍ ജസീറയെ ഉദ്ധരിച്ച് എ.പി.എ ആണ് വാര്‍ത്ത റിപ്പോര്‍ട്ട് ചെയ്തത്.

ഇറാന്റെ ഇടക്കാല ലീഡര്‍ഷിപ്പ് കൗണ്‍സില്‍ കഴിഞ്ഞ ദിവസം ചേര്‍ന്ന യോഗത്തിലാണ് ഗള്‍ഫിലെ അയല്‍രാജ്യങ്ങളെ ആക്രമിക്കേണ്ടതില്ലെന്ന സുപ്രധാന തീരുമാനമെടുത്തത്. ഇറാന്റെ ഔദ്യോഗിക മാധ്യമങ്ങളും പ്രസിഡന്റിന്റെ പ്രസ്താവന പുറത്തുവിട്ടിട്ടുണ്ട്. അയല്‍രാജ്യങ്ങളില്‍ നിന്ന് ഇറാന് നേരെ ആക്രമണമുണ്ടാകാത്തിടത്തോളം കാലം ആ രാജ്യങ്ങള്‍ക്ക് നേരെ ഇനിയൊരു സൈനിക നീക്കം ഇറാന്റെ ഭാഗത്തുനിന്ന് ഉണ്ടാകില്ലെന്ന് പ്രസിഡന്റ് പ്രഖ്യാപിച്ചു. കഴിഞ്ഞ ദിവസങ്ങളില്‍ അയല്‍രാജ്യങ്ങളിലെ വിവിധ കേന്ദ്രങ്ങളില്‍ നടത്തിയ ആക്രമണങ്ങളില്‍ ഇറാന്‍ പ്രസിഡന്റ് ഔദ്യോഗികമായി മാപ്പുചോദിക്കുകയും ചെയ്തു. മേഖലയിലെ രാജ്യങ്ങളുമായി ഇറാന്‍ ശത്രുത ആഗ്രഹിക്കുന്നില്ലെന്നും സമാധാനപരമായ സഹവര്‍ത്തിത്വമാണ് ലക്ഷ്യമെന്നും അദ്ദേഹം കൂട്ടിച്ചേര്‍ത്തു.

യു.എസ്, ഇസ്‌റാഈല്‍ പക്ഷവുമായുള്ള പോരാട്ടം രൂക്ഷമായതിനെത്തുടര്‍ന്ന് ഗള്‍ഫ് മേഖലയിലുണ്ടായ സാമ്പത്തിക പ്രതിസന്ധിയും നയതന്ത്ര സമ്മര്‍ദ്ദവുമാണ് ഇറാന്റെ പുതിയ നീക്കത്തിന് പിന്നിലെന്ന് വിലയിരുത്തപ്പെടുന്നു. സഊദി അറേബ്യ, യു.എ.ഇ തുടങ്ങിയ രാജ്യങ്ങളിലെ നിക്ഷേപങ്ങളെയും സാമ്പത്തിക ഭദ്രതയെയും യുദ്ധം ബാധിച്ചതോടെ മേഖലയില്‍ ഒറ്റപ്പെടാതിരിക്കാനുള്ള ശ്രമത്തിലാണ് തെഹ്‌റാന്‍.

ഡ്രോണ്‍ ആക്രമണങ്ങള്‍ മൂലം ഖത്തറിലെ വാതക ഉല്‍പ്പാദനം തടസ്സപ്പെട്ടതും സഊദിയിലെ എണ്ണ ശുദ്ധീകരണശാലകള്‍ക്ക് നേരെയുണ്ടായ ആക്രമണങ്ങളും വലിയ പ്രതിഷേധത്തിന് കാരണമായിരുന്നു. ഗള്‍ഫ് രാഷ്ട്രങ്ങള്‍ തങ്ങളുടെ അമേരിക്കന്‍ നിക്ഷേപങ്ങള്‍ പിന്‍വലിക്കാനുള്ള ആലോചനകള്‍ ആരംഭിച്ചതും ഇറാന്റെ നിലപാട് മാറ്റത്തിന് കാരണമായിട്ടുണ്ടാകാമെന്ന് രാഷ്ട്രീയ നിരീക്ഷകര്‍ കരുതുന്നു.

ALSO READ: 'ഇറാനെ ആക്രമിക്കുന്നത് നേരത്തെ അറിയിച്ചില്ല; ഇറാന്‍ ആക്രമണത്തില്‍നിന്ന് പ്രതിരോധിക്കാന്‍ സഹായിക്കുന്നുമില്ല'; യു.എസിനെതിരേ പരാതിയുമായി ഗള്‍ഫ് രാജ്യങ്ങള്‍ | Iran- US- Israel War Live Updates

The Iranian interim leadership council approved yesterday that neighbouring countries will no longer be attacked, unless an attack on Iran originates from there, President Masoud Pezeshkian has said. In remarks carried out by Iranian media, the president also apologised to the neighbouring countries for the strikes that took place in the past days.