തിരുവനന്തപുരം: തദ്ദേശ തെരഞ്ഞെടുപ്പ് നടക്കുന്നതിനിടെ തിരുവനന്തപുരം വഞ്ചിയൂരിൽ സംഘർഷം. സിപിഎം വ്യാപകമായി കള്ളവോട്ട് ചെയ്തുവെന്ന് ആരോപിച്ചാണ് സംഘർഷം നടക്കുന്നത്. ബിജെപി പ്രവർത്തകർ റോഡിൽ കുത്തിയിരുന്ന് പ്രതിഷേധം നടത്തുകയാണ്. ബൂത്ത് ഒന്നിലാണ് കള്ളവോട്ട് നടന്നുവെന്ന ആരോപണമുണ്ടായത്.  റീപോളിങ് വേണമെന്നാണ് ബിജെപി ആവശ്യപ്പെടുന്നത്.

സിപിഎമ്മിന് അനുകൂലമായി വോട്ടർ പട്ടികയിൽ നിന്നും ആളുകളെ കൂട്ടത്തോടെ വെട്ടിമാറ്റിയെന്നും ചേർത്തതെന്നും ഉൾപ്പെടുന്ന ആരോപണങ്ങൾ നേരത്തെ തന്നെ വഞ്ചിയൂരിൽ നിലനിന്നിരുന്നു. കോൺഗ്രസും ബിജെപിയും ആണ് ഈ ആരോപണങ്ങൾ ഉന്നയിച്ചത്. വഞ്ചിയൂരിൽ താമസിക്കാത്ത ആളുകളെ പുറത്തുനിന്നും കൊണ്ടുവന്ന് വോട്ടർ ലിസ്റ്റിൽ പേര് ചേർത്തെന്നും ഇത് കള്ളവോട്ട് ആണെന്നും പോളിംഗ് ഉദ്യോഗസ്ഥർക്ക് ഇതിൽ പങ്കുണ്ടെന്നുമാണ് ബിജെപി ആരോപിക്കുന്നത്. അതേസമയം സിപിഎം ഈ ആരോപണങ്ങളെല്ലാം തള്ളിയിട്ടുണ്ട്.