കുവൈത്ത് സിറ്റി: 2026-ലെ വിശുദ്ധ റമദാൻ മാസത്തിൽ രാജ്യത്തെ സർക്കാർ ജീവനക്കാരുടെ ഔദ്യോഗിക ജോലി സമയം കുവൈത്ത് സിവിൽ സർവീസ് കമ്മീഷൻ (CSC) സ്ഥിരീകരിച്ചു. മുൻ വർഷങ്ങളിലെ പോലെ ഇത്തവണയും ജീവനക്കാർക്ക് സൗകര്യപ്രദമായ രീതിയിൽ ‘ഫ്ലെക്സിബിൾ വർക്കിംഗ് സിസ്റ്റം’ (Flexible Working Hours) തുടരുമെന്ന് അധികൃതർ വ്യക്തമാക്കി. റമദാനിൽ രാവിലത്തെ ഷിഫ്റ്റിന് ആകെ 4.5 മണിക്കൂർ മാത്രമായിരിക്കും ജോലി സമയം. 

ജീവനക്കാർക്ക് രാവിലെ 8:30 മുതൽ 10:30 വരെയുള്ള ഫ്ലെക്സിബിൾ വിൻഡോയിൽ ഇഷ്ടമുള്ള സമയം തിരഞ്ഞെടുത്ത് ഹാജർ ചെയ്യാം. ഹാജർ രേഖപ്പെടുത്തിയ സമയം മുതൽ 4.5 മണിക്കൂർ ജോലി പൂർത്തിയാക്കിയ ശേഷം മടങ്ങാം. റമദാനിലെ ജീവനക്കാരുടെ ആവശ്യങ്ങൾ കണക്കിലെടുത്തും സർക്കാർ സേവനങ്ങളുടെ തുടർച്ച ഉറപ്പാക്കിയുമാണ് ഈ ക്രമീകരണം.

റമദാനിൽ മൂന്ന് പ്രധാന ആനുകൂല്യങ്ങൾ 

- എല്ലാ ജീവനക്കാർക്കും പ്രവൃത്തി ദിനത്തിന്റെ തുടക്കത്തിലും അവസാനത്തിലും 15 മിനിറ്റ് ഗ്രേസ് പിരിയഡ്.

- വനിതാ ജീവനക്കാർക്ക് പ്രവൃത്തി ദിനാവസാനം അധികമായി 15 മിനിറ്റ് ഇളവ്.

- നിലവിലുള്ള നിയമങ്ങൾ അനുസരിച്ച് അവധി അല്ലെങ്കിൽ വൈകിയെത്തൽ അനുമതി അപേക്ഷിക്കാനുള്ള അവകാശം.

ഈ ആനുകൂല്യങ്ങളുടെ കണക്കാക്കൽ ഇങ്ങനെ:

- അനുവദനീയമായ അവസാന ഹാജർ സമയമായ 10:30ന് ശേഷമാണ് 15 മിനിറ്റ് ഗ്രേസ് പിരിയഡ് ആരംഭിക്കുന്നത്.

- 10:45ന് ശേഷമുള്ള വൈകലുകൾ മാത്രമേ കണക്കാക്കൂ.

- അനുമതി മണിക്കൂറുകൾ 8:30 മുതൽ 10:30 വരെയുള്ള വിൻഡോയിൽ യഥാർത്ഥ ഹാജർ സമയം മുതൽ കണക്കാക്കും.

അഞ്ച് നിശ്ചിത ഷെഡ്യൂളുകളിൽ ഒന്ന് തിരഞ്ഞെടുക്കാം

ഫ്ലെക്സിബിൾ സിസ്റ്റത്തിന് പുറമെ, സ്ഥാപനങ്ങൾക്ക് അഞ്ച് നിശ്ചിത ഷെഡ്യൂളുകളിൽ ഒന്ന് തിരഞ്ഞെടുക്കാം. തിരഞ്ഞെടുത്ത ഷെഡ്യൂൾ നിർബന്ധമാക്കി നടപ്പാക്കണം, ഫ്ലെക്സിബിളിലേക്ക് മാറ്റാനാവില്ല.

അനുവദനീയ നിശ്ചിത ഷെഡ്യൂളുകൾ:

- 8:30 am മുതൽ 1:00 pm വരെ

- 9:00 am മുതൽ 1:30 pm വരെ

- 9:30 am മുതൽ 2:00 pm വരെ

- 10:00 am മുതൽ 2:30 pm വരെ

- 10:30 am മുതൽ 3:00 pm വരെ

മറ്റ് പ്രധാന നിർദേശങ്ങൾ:

- 'പ്രസൻസ് പ്രൂഫ്' ഫിംഗർപ്രിന്റ് ഹാജർ രേഖപ്പെടുത്തിയ് രണ്ട് മണിക്കൂർ കഴിഞ്ഞ് മാത്രം.

- കുറഞ്ഞ ജോലി സമയമോ ഭാഗിക അവധിയോ ഉള്ള ജീവനക്കാർക്ക് ഫ്ലെക്സിബിൾ സിസ്റ്റം ബാധകമല്ല; നിശ്ചിത ഷെഡ്യൂളുകളിൽ ഒന്ന് മാത്രം.

- ഷിഫ്റ്റ് അടിസ്ഥാനത്തിലുള്ള അല്ലെങ്കിൽ ഓൺ-കോൾ ജോലികൾക്ക് മാറ്റമില്ല.

- പ്രത്യേക പ്രവർത്തന സ്വഭാവമുള്ള സ്ഥാപനങ്ങൾ സിഎസ്സിയിൽ നിന്ന് അനുമതി തേടണം, എന്നാൽ ആകെ ജോലി സമയം 4.5 മണിക്കൂറിൽ കവിയരുത്.

2026 ഫെബ്രുവരി പകുതിയോടെ റമദാൻ ആരംഭിക്കുമെന്നാണ് നിലവിലെ കണക്കുകൂട്ടൽ.

The Kuwait Civil Service Commission (CSC) has confirmed the official working hours of government employees during the holy month of Ramadan 2026