കോട്ടയം: പാലാ നഗരസഭയില്‍ ദിയ ബിനു പുളിക്കക്കണ്ടം നഗരസഭാ ചെയര്‍പേഴ്സണായി ചുമതലയേറ്റു. 21 കാരിയായ ദിയ 14 വോട്ടുകള്‍ നേടിയാണ് ജയിച്ചത്. രാജ്യത്തെ ഏറ്റവും പ്രായം കുറഞ്ഞ മുന്‍സിപ്പല്‍ ചെയര്‍ പേഴ്സണ്‍ എന്ന നേട്ടവും ദിയ സ്വന്തമാക്കി. 

പുളിക്കക്കണ്ടം കുടുംബത്തിലെ മൂന്ന് പേരായിരുന്നു പാലാ നഗരസഭയില്‍ സ്വതന്ത്രരായി ജയിച്ചത്. ഒരുപാട് ചര്‍ച്ചകള്‍ക്കൊടുവിലാണ് കുടുംബം യു.ഡി.എഫിന് പിന്തുണ നല്‍കാനായി തീരുമാനിച്ചത്. എല്‍.ഡി.എഫ് നേതാക്കളും കുടുംബവുമായി ചര്‍ച്ച നടത്തിയിരുന്നെങ്കിലും വിജയം കണ്ടില്ല. 

പാല എം.എല്‍.എ മാണി സി കാപ്പന്‍ അടക്കം, പ്രമുഖ യു.ഡി.എഫ് നേതാക്കള്‍ സത്യപ്രതിജ്ഞാ ചടങ്ങിനെത്തിയിരുന്നു. എല്‍.ഡി.എഫിന് പന്ത്രണ്ട് വോട്ടുകള്‍ ലഭിച്ചു.

കാലം കാത്തുവച്ച കാവ്യനീതിയാണെന്നായിരുന്നു സത്യപ്രതിജ്ഞയ്ക്ക് ശേഷം ദിയയുടെ പ്രതികരണം. ഒത്തിരി സന്തോഷം തോന്നുന്നു. ജനങ്ങള്‍ നല്‍കിയ വിധിയാണ് ഇതെന്നും അവര്‍ ആഗ്രഹിച്ചതുപോലെ പ്രവര്‍ത്തിക്കാന്‍ ശ്രമിക്കുമെന്നും ദിയ പറഞ്ഞു.