തൃശൂര്‍: മേയര്‍ തെരഞ്ഞെടുപ്പിന് മണിക്കൂറിന് മണിക്കൂറുകള്‍ മാത്രം അവശേഷിക്കുമ്പോള്‍ തൃശൂരില്‍ അതൃപ്തി പരസ്യമാക്കി കോണ്‍ഗ്രസ് കൗണ്‍സിലര്‍ ലാലി ജെയിംസ്. പാര്‍ട്ടി നേതൃത്വം പണം വാങ്ങി മേയര്‍ പദവി വിറ്റെന്ന ഗുരുതര ആരോപണമാണ് ലാലി ഉന്നയിച്ചിരിക്കുന്നത്. നിയുക്ത മേയര്‍ നിജി ജസ്റ്റിനും ഭര്‍ത്താവും പെട്ടിയുമായി എഐസിസി നേതാക്കളെ പോയി കണ്ടെന്നും പണം ഇല്ലാത്തതിന്റെ പേരില്‍ പാര്‍ട്ടി തന്നെ തഴയുകയായിരുന്നെന്നും അവര്‍ പറഞ്ഞു. രണ്ട് ദിവസം മുന്‍പാണ് ഇടപാടുകള്‍ നടന്നതെന്നും അവര്‍ ആരോപിച്ചു. 

കൗണ്‍സിലര്‍മാരില്‍ ഭൂരിഭാഗവും തന്റെ പേരാണ് പറഞ്ഞത്. എന്നിട്ടും തഴയുകയായിരുന്നു. മേയര്‍ പദവി ലഭിക്കില്ലെന്ന് അറിഞ്ഞപ്പോള്‍ ജില്ലയിലെ മുതിര്‍ന്ന നേതാവിനെ കണ്ടിരുന്നു. അപ്പോഴാണ് ഇക്കാര്യം അറിഞ്ഞത്. ഒരു വര്‍ഷമെങ്കിലും മേയര്‍ ആക്കുമോ എന്ന് താന്‍ ചോദിച്ചു. ഇടയ്ക്ക് ഒരു വര്‍ഷം നല്‍കാമെന്ന് പറഞ്ഞു. അത് തനിക്ക് വേണ്ട. മേയര്‍ സ്ഥാനാര്‍ത്ഥിക്ക് വോട്ട് ചെയ്യുന്ന കാര്യത്തില്‍ തീരുമാനമെടുത്തിട്ടില്ലെന്നും ഇതുവരെയും പാര്‍ട്ടി വിപ്പ് കൈപ്പറ്റിയില്ലെന്നും ലാലി ജെയിംസ് പറഞ്ഞു.

തന്റേത് കര്‍ഷക കുടുംബമാണെന്നും നല്‍കാന്‍ പണമില്ലാത്തതാണ് പ്രശ്‌നമെന്നും അവര്‍ പറഞ്ഞു. നാല് തവണ ജയിച്ചിട്ടും തന്നെ മേയറാക്കിയില്ലെന്നും താന്‍ കോണ്‍ഗ്രസുകാരിയായി തുടരുമെന്നും നിജിക്ക് വോട്ടുചെയ്യുമെന്നും ലാലി കൂട്ടിച്ചേര്‍ത്തു. 

അതേസമയം, ലാലി ജെയിംസ് ഉന്നയിച്ച ആരോപണങ്ങള്‍ കോണ്‍ഗ്രസ് ജില്ലാ നേതൃത്വം തള്ളിയിട്ടുണ്ട്. 

തൃശൂര്‍ ഡി.സി.സി വൈസ് പ്രസിഡന്റായ ഡോ.നിജിയെ ഇന്നലെ രാവിലെ കെ.പി.സി.സി നേതൃത്വം മേയറായി തീരുമാനിച്ചിരുന്നു. എന്നാല്‍ ഉച്ചയോടെ ലാലി ജയിംസിനെ അനുകൂലിച്ച് കൗണ്‍സിലര്‍മാര്‍ രംഗത്തെത്തിയതോടെയാണ് ഭിന്നത രൂക്ഷമായത്. ഇരുവര്‍ക്കും പുറമെ സുബി ബാബുവിനെയും കോണ്‍ഗ്രസ് മേയര്‍ സ്ഥാനാര്‍ഥിയായി പരിഗണിച്ചിരുന്നു. 

Congress councillor Laly James has sparked a major controversy in Thrissur just hours before the mayoral election by alleging that the party leadership sold the mayoral post for money. She claimed that she was sidelined because she could not pay, while the newly appointed mayor Niji Justin and her husband allegedly met AICC leaders with cash-filled bags. According to Laly James, the alleged financial dealings took place two days ago, exposing serious internal conflict within the Thrissur Congress unit.