തിരുവനന്തപുരം: ശബരിമല സ്വര്‍ണക്കൊള്ളയുമായി ബന്ധപ്പെട്ട് ആരോപണ നിഴലിലുള്ള ഡി മണിയെന്ന ബാലമുരുകന്റെ വീട്ടില്‍ റെയ്ഡ്. പ്രത്യേക അന്വേഷണ സംഘമാണ് തമിഴ്‌നാട് ഡിണ്ടിഗലിലെ വീട്ടില്‍ പരിശോധന നടത്തുന്നത്. മണിയെ അന്വേഷണ സംഘം ചോദ്യം ചെയ്തു. 

മണിയുടെ സഹായി ശ്രീകൃഷ്ണനെ എസ്‌ഐടി നേരത്തെ ചോദ്യം ചെയ്തിരുന്നു. വിഗ്രഹക്കടത്തിന് ശ്രമിച്ചിട്ടില്ലെന്നായിരുന്നു ഇറിഡിയം തട്ടിപ്പുകേസില്‍ പ്രതിയായ ശ്രീകൃഷ്ണന്റെ മൊഴി. 

വെള്ളിയാഴ്ച്ച രാവിലെ 10.30 ഓടെയാണ് ഡി മണിയുടെ വീട്ടില്‍ പരിശോധന ആരംഭിച്ചത്. ഡി.മണി ശബരിമലയിലെ പഞ്ചലോഹ വിഗ്രഹങ്ങള്‍ വാങ്ങിയെന്നായിരുന്നു വിദേശ വ്യവസായിയുടെ മൊഴിയില്‍ ഉണ്ടായിരുന്നത്. 

ഡയമണ്ട് മണി, ദാവൂദ് മണി എന്നിങ്ങനെ പല പേരുകളില്‍ അറിയപ്പെടുന്ന ഇയാളെ അന്വേഷണ സംഘം നേരത്തെ ചോദ്യം ചെയ്തിരുന്നു. എന്നാല്‍, തനിക്ക് ശബരിമല സ്വര്‍ണക്കൊള്ളയുമായി യാതൊരു ബന്ധവുമില്ലെന്നും ഉണ്ണികൃഷ്ണന്‍ പോറ്റിയെ തനിക്ക് അറിയില്ലെന്നും ഇയാള്‍ മൊഴി നല്‍കി.