തിരുവനന്തപുരം: സി.പി.ഐയെ വിമര്‍ശിച്ച് എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. പത്തുവര്‍ഷം കൂടെ നിന്ന് എല്ലാം നേടിയിട്ട് ഇപ്പോള്‍ തള്ളിപ്പറയുകയാണെന്നും സി.പി.ഐയില്‍ ചതിയന്‍ ചന്തുമാരാണ് ഉള്ളതെന്നും അദ്ദേഹം പറഞ്ഞു. വിമര്‍ശനം ഉണ്ടെങ്കില്‍ പറയേണ്ടത് പാര്‍ട്ടിക്കുള്ളിലെന്നും വെള്ളാപ്പള്ളി മാധ്യമങ്ങളോട് പ്രതികരിച്ചു.

എന്നാല്‍ തൊട്ടുപിന്നാലെ മറുപടിയുമായി ബിനോയ് വിശ്വം രംഗത്തെത്തി. പറയുന്നവര്‍ത്ത് തന്നെയാണ് ആ തൊപ്പി ചേരുകയെന്ന് അദ്ദേഹം പറഞ്ഞു. ഇടതുപക്ഷ ജനാധിപത്യ മുന്നണിയുടെ പ്രവര്‍ത്തനങ്ങള്‍ക്കും അതിലെ ഘടകകക്ഷികള്‍ക്കും മാര്‍ക്കിടാന്‍ വെള്ളാപ്പള്ളിയെ ആരും ഏല്‍പ്പിച്ചിട്ടില്ല. ഇനി ഏല്‍പ്പിക്കാന്‍ പോകുന്നില്ലെന്നും അദ്ദേഹം പറഞ്ഞു. വെള്ളാപ്പള്ളിയല്ല എല്‍.ഡി.എഫ് എന്നും അദ്ദേഹം കൂട്ടിച്ചേര്‍ത്തു.

വെള്ളാപ്പള്ളിയെ തന്റെ കാറില്‍ കയറ്റില്ലെന്നും മുഖ്യമന്ത്രിയെ ഉന്നമിട്ടുള്ള വിമര്‍ശനം സി.പി.ഐയില്‍ ഉണ്ടായിട്ടില്ലെന്നും ബിനോയ് വിശ്വം പറഞ്ഞു. വെള്ളാപ്പള്ളി യഥാര്‍ഥ വിശ്വാസിയാണോ എന്ന് മാധ്യമങ്ങള്‍ വിലയിരുത്തണമെന്നും അദ്ദേഹം പറഞ്ഞു.