കൊല്ലം: ഓണക്കാലത്തു ആയിരക്കണക്കിനു കുടുംബങ്ങളെ പട്ടിണിയിലാക്കി നന്മസ്‌റ്റോറുകള്‍ അടച്ചുപൂട്ടാനുള്ള സര്‍ക്കാര്‍ നീക്കത്തിനെതിരേ നന്മസ്‌റ്റോര്‍ സംരക്ഷണസമിതി അനിശ്ചിതകാല സമരത്തിനൊരുങ്ങുന്നു.
സമരത്തിന്റെ മുന്നോടിയെന്നോണം ശാസ്താംകോട്ട ഭരണിക്കാവ് ത്രിവേണി സ്‌റ്റോറിനു മുന്നില്‍ തൊഴിലാളികള്‍ ഇന്നു അനിശ്ചിതകാല റിലേ സത്യാഗ്രഹം ആരംഭിക്കും. തിരുവോണദിവസം കൊല്ലം ചിന്നക്കടയില്‍ ഉപവാസവും നടത്തും. ഉപവാസം ഐ.എന്‍.ടി.യു.സി സംസ്ഥാന പ്രസിഡന്റ് ആര്‍ ചന്ദ്രശേഖരന്‍ ഉദ്ഘാടനം ചെയ്യുമെന്ന് ഐ.എന്‍.ടി.യു.സി യുവജനവിഭാഗം ദേശീയ വൈസ് പ്രസിഡന്റ് കാഞ്ഞിരവിള അജയകുമാര്‍ വാര്‍ത്താസമ്മേളനത്തില്‍ അറിയിച്ചു.
3000 തൊഴിലാളികളാണ് സംസ്ഥാനത്തൊട്ടാകെ നന്മ സ്‌റ്റോറുകളില്‍ ജോലിചെയ്യുന്നത്. ഏറ്റവും കൂടുതല്‍ തൊഴിലാളികളുള്ളതു കൊല്ലം ജില്ലയിലാണ്. ഇതുവരെയുള്ള ആനുകൂല്യങ്ങള്‍ കൊടുക്കാതെയാണ് തൊഴിലാളികളെ പിരിച്ചുവിടുന്നത്. നന്മ സ്‌റ്റോറുകള്‍ നഷ്ടത്തിലാണ് പ്രവര്‍ത്തിക്കുന്നതെന്നുള്ള പ്രചരണത്തിന്റെ പിന്നില്‍ ഗൂഢലക്ഷ്യമാണുള്ളത്. ക്രമവിരുദ്ധമായ പ്രവര്‍ത്തനങ്ങളിലൂടെയും സാമ്പത്തിക തിരിമറികളിലൂടെയും നഷ്ടമുണ്ടാക്കി വിജിലന്‍സ് കേസില്‍ അകപ്പെട്ടവരെ സംരക്ഷിക്കുന്നതും തൊഴിലാളികളെ ശിക്ഷിക്കുന്നതും അപലനീയമാണ്. നന്മ സ്‌റ്റോറില്‍ നിയമനത്തിനായി കോഴവാങ്ങിയ നേതാക്കളുണ്ടെങ്കില്‍ അവരുടെ വസതികളിലേക്കു സംഘടനാ മാര്‍ച്ചു നടത്തും. വിജിലന്‍സ് കേസില്‍ പ്രതിയായ മുഴുവന്‍ ഉദ്യോഗസ്ഥരെയും പുറത്താക്കി തൊഴിലാളികളെ സംരക്ഷിക്കാന്‍ കണ്‍സ്യൂമര്‍ഫെഡ് തയാറാകണമെന്നും അജയകുമാര്‍ ആവശ്യപ്പെട്ടു.
വാര്‍ത്താസമ്മേളനത്തില്‍ പനയം സജീവ്, അശോകന്‍പിള്ള, അഭിലാഷ്, വിഷ്ണു, പ്രദീപ്, രാഹുല്‍ പങ്കെടുത്തു.