മലപ്പുറം: തിരുവോണ നാളില്‍ ആള്‍ കേരള ഡോക്യുമെന്ററി റൈറ്റേഴ്‌സ് ആന്റ് സ്‌ക്രൈബ്‌സ് അസോസിയേഷന്‍ ജില്ലാ കമ്മിറ്റിയുടെ നേതൃത്വത്തില്‍ തിരുവോണ നാളില്‍ ആധാരമെഴുത്തുകാര്‍ നിരാഹാരസമരം നടത്തും. 14നു പാസ്‌പോര്‍ട്ട് ഓഫിസിനു മുന്നില്‍ നിന്നു പ്രകടനമായെത്തി കെ.എസ്.ആര്‍ ടി.സി പരിസരത്താണു നിരാഹാര സമരം.
രാവിലെ 10ന് അഡ്വ. എം ഉമ്മര്‍ എംഎല്‍എ ഉദ്ഘാടനം ചെയ്യും. ട്രേഡ് യൂണിയന്‍ നേതാക്കളും പങ്കെടുക്കും. സംസ്ഥാന വ്യാപകമായി നടത്തുന്ന സമര ഭാഗമായാണിത്. ആര്‍ക്കും ആധാരമെഴുതാമെന്ന ഉത്തരവു റദ്ദാക്കുക, ക്ഷേമനിധി ആനുകൂല്യങ്ങള്‍ വര്‍ധിപ്പിച്ചു കൃത്യമായി വിതരണം ചെയ്യുക, പെന്‍ഷന്‍ അനുവദിക്കുക, ഭൂമിയുടെ താരിഫ് വിലയിലെ അപാകത പരിഹരിക്കുക, ആധാരം എഴുത്തുകാര്‍ക്കെതിരെയുള്ള ശിക്ഷാ നടപടികള്‍ അവസാനിപ്പിക്കുക, രജിസ്‌ട്രേഷന്‍ ഡിപ്പാര്‍ട്ട്‌മെന്റിലെ അഴിമതി അവസാനിപ്പിക്കുക തുടങ്ങിയ ആവശ്യമുന്നയിച്ചാണു സമരം. ഇതു സംബന്ധിച്ച വാര്‍ത്താ സമ്മേളനത്തില്‍ ജില്ലാ പ്രസിഡന്റ് പെരുമ്പള്ളി മുഹമ്മദ് ഹംസ ഹാജി, ജില്ലാ സെക്രട്ടറി സി.പി അശോകന്‍ എന്നിവര്‍ പങ്കെടുത്തു.