മലപ്പുറം: റവന്യൂ വകുപ്പിന്റെ നടപടികള്‍ കുറ്റമറ്റാതാക്കുന്നതിനും പ്രവര്‍ത്തനങ്ങള്‍ സുതാര്യമാക്കുന്നതിനും കൈയേറ്റങ്ങള്‍, വയല്‍ നികത്തല്‍ തുടങ്ങിയവ കണ്ടെത്തുന്നതിനും റവന്യൂ വിജിലന്‍സ് സംവിധാനം ശക്തിപ്പെടുത്തുമെന്ന് റവന്യു മന്ത്രി ഇ. ചന്ദ്രശേഖരന്‍ പറഞ്ഞു. കലക്‌ട്രേറ്റ് കോണ്‍ഫറന്‍സ് ഹാളില്‍ ചേര്‍ന്ന റവന്യൂ ഉദ്യോഗസ്ഥരുടെ അവലോകന യോഗത്തില്‍ സംസാരിക്കുകായിരുന്നു മന്ത്രി. നിലവില്‍ മേഖലാ തലത്തില്‍ കോഴിക്കോട്, തിരുവനന്തപുരം, എറണാംകുളം എന്നിവിടങ്ങളിലാണ് വിജിലന്‍സ് സംവിധാനം പ്രവര്‍ത്തിക്കുന്നത്. ഇത് കൂടുതല്‍ ജില്ലകളിലേക്കു വ്യാപിപ്പിക്കാനാണ് ഉദേശിക്കുന്നത്. വില്ലേജുകള്‍ വഴി വീടുകള്‍ക്ക് ആഡംബര നികുതി പിരിക്കുന്നതിന് സ്ലാബ് സംവിധാനം കൊണ്ടുവുരുന്നതു പരിഗണിക്കുമെന്ന് മന്ത്രി പറഞ്ഞു. ഭൂരഹിതര്‍ക്ക് ഭൂമികണ്ടെത്തുന്നതിന്റെ ഭാഗമായി മിച്ച ഭൂമിയുമായി ബന്ധപ്പെട്ട ലാന്‍ഡ് ട്രൂബ്യൂണലില്‍ കെട്ടികിടക്കുന്ന കേസുകള്‍ കൂടുതല്‍ വേഗത്തില്‍ പരിഹരിക്കാന്‍ മന്ത്രി ആവശ്യപ്പെട്ടു.