കോഴിക്കോട്: കുന്ദമംഗലത്ത് കാറും പിക്കപ്പ് ലോറിയും കൂട്ടിയിടിച്ച് മൂന്ന് പേർക്ക് ദാരുണാന്ത്യം. കാർ യാത്രക്കാരായ രണ്ടുപേരും പിക്കപ്പ് ഡ്രൈവറുമാണ് മരിച്ചത്. പുലർച്ചെ 2 മണിയോടെയായിരുന്നു അപകടം. അപകടത്തിൽ രണ്ടുപേർക്ക് പരുക്കേറ്റു. ഇതിൽ ഒരാളുടെ നില ഗുരുതരമാണെന്നാണ് വിവരം.

കാർ യാത്രക്കാരനായിരുന്ന കൊടുവള്ളി സ്വദേശി നിഹാൽ, ഈങ്ങാപ്പുഴ പുതുപ്പാടി സ്വദേശി മലോറം കണക്കാഞ്ചാലിൽ സുബ്ക്കി, പിക്കപ്പ് ഡ്രൈവർ വയനാട് സ്വദേശി ഷമീർ എന്നിവരാണ് മരിച്ചത്. പിക്കപ്പ് വാനിലുണ്ടായിരുന്ന ക്ളീനറെ പരുക്കുകളോടെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

ALSO READ: എംഎസ്എഫ് കണ്ണൂര്‍ ജില്ലാ കമ്മിറ്റി അംഗത്തിന് വെട്ടേറ്റു

ദേശീയപാത മുറിയനാലിൽ വെച്ചാണ് അപകടമുണ്ടായത്. കൊടുവള്ളി ഭാഗത്തേക്ക് പോവുകയായിരുന്ന കാറും കുന്ദമംഗലം ഭാഗത്തേക്ക് പോവുന്ന പിക്കപ്പ് വാനുമാണ് കൂട്ടിയിടിച്ചത്. ഇടിയുടെ ആഘാതത്തിൽ കാർ പൂർണ്ണമായും തകർന്നു. രക്ഷാപ്രവർത്തനത്തിന് നാട്ടുകാരും പൊലിസും ഉടൻ എത്തിയിരുന്നു. പിന്നാലെ വെള്ളിമാടുകുന്ന്‌ ഫയർ ഫോഴ്സ് സംഘമെത്തി ഹൈഡ്രോളിക് കട്ടർ ഉൾപ്പെടെ ഉപയോഗിച്ച് വാഹനങ്ങൾ വെട്ടിപ്പൊളിച്ചാണ് കാർ യാത്രക്കാരെ പുറത്തെടുത്തത്.

മൂന്ന് പേരും സംഭവ സ്ഥലത്ത് തന്നെ മരണപ്പെട്ടതായാണ് ലഭ്യമായ വിവരം. മൃതദേഹങ്ങൾ കോഴിക്കോട് മെഡിക്കൽ കോളേജിലേക്ക് മാറ്റി.