ഒരേ ദിക്കിലേക്കു നോക്കി
ഒരേ കാഴ്ച കണ്ട്
ഒരേ പോലിങ്ങഐത്രനാള്‍ നില്‍ക്കും?
നിനക്കു മടുത്തുപോകില്ലേ?

ഉച്ചിയില്‍ സൂര്യന്‍
കനല്‍കോരി ഒഴിക്കുമ്പൊഴും
തണുപ്പിന്റെ സൂചികള്‍
തുളഞ്ഞു കേറുമ്പൊഴും
നിനക്കിങ്ങനെ ചിരിച്ചുനില്‍ക്കാന്‍
കഴിയുന്നുണ്ടല്ലോ.

കാക്കകള്‍ കൂട്ടമായ്
നിന്റെ തല കൊത്തി ചിനക്കുമ്പൊഴും
കളിപറഞ്ഞു കുട്ടികള്‍
കല്ലെറിയുമ്പൊഴും
ഒരുനോട്ടം കൊണ്ടെങ്കിലും
അവറ്റകളെ ആട്ടിപ്പായിക്കാമായിരുന്നില്ലേ?

അവരെ കുറ്റംപറഞ്ഞിട്ടു കാര്യമില്ല
പിഞ്ഞിക്കീറിയ എന്റെ ഉടുപ്പില്‍ നില്‍ക്കുന്ന
നിന്നെ കണ്ട്
ഞാന്‍ പോലും
തെറ്റിദ്ധരിച്ചിട്ടുണ്ട്.