ആലപ്പുഴ: ജലന്ധർ മുൻ ബിഷപ്പ് ഫ്രാങ്കോ മുളയ്ക്കലിനെ കുറ്റവിമുക്തനാക്കിയതിനെതിരെ ഹൈക്കോടതിയിൽ സമർപ്പിച്ചിട്ടുള്ള അപ്പീലിൽ വാദിക്കാൻ സ്പെഷ്യൽ പബ്ലിക് പ്രോസിക്യൂട്ടറെ നിയമിക്കണമെന്ന അതിജീവിതയുടെ ആവശ്യം സർക്കാർ പരിഗണിക്കുന്നില്ലെന്ന് പരാതി. ബിഷപ്പിനെ കോട്ടയം വിചാരണക്കോടതി കുറ്റവിമുക്തനാക്കിയിട്ട് ഇന്ന് നാല് വർഷം പൂർത്തിയാവുകയാണ്.

രാഹുൽ കേസുമായുള്ള താരതമ്യം: 'അതേ ആർജവം' ഇല്ലാത്തതിനെതിരെ ആക്ഷേപം

രാഹുൽ മാങ്കൂട്ടത്തിൽ എം.എൽ.എ.യ്ക്കെതിരായ കേസിലെ ആദ്യ അതിജീവിതയായ സ്ത്രീയുടെ ഫെയ്സ്ബുക്ക് പോസ്റ്റിലെ വാക്യങ്ങൾ അച്ചടിച്ച് മുഖ്യമന്ത്രി പിണറായി വിജയൻ വെള്ളം കുടിക്കുന്ന ചിത്രം സോഷ്യൽ മീഡിയയിൽ വൈറലായിരുന്നു. "അതേ ആർജവവും നീതിന്യായവും ഈ കേസിലും പ്രതീക്ഷിക്കുന്നു," എന്നാണ് അതിജീവിത പറയുന്നത്.

കഴിഞ്ഞ നവംബർ 12-ന് അതിജീവിത മുഖ്യമന്ത്രിയെ നേരിട്ട് കണ്ട് ആവശ്യപ്പെട്ടെങ്കിലും രണ്ട് മാസം പിന്നിട്ടിട്ടും നടപടിയുണ്ടായില്ല.മുൻ ലോ സെക്രട്ടറിയും റിട്ടയേർഡ് ജില്ലാ ജഡ്ജിയുമായ മുതിർന്ന അഭിഭാഷകൻ ബി.ജി. ഹരീന്ദ്രനാഥിന്റെ പേരാണ് അതിജീവിത നിർദ്ദേശിച്ചിരിക്കുന്നത്.പ്രമുഖ നടി ആക്രമിക്കപ്പെട്ട കേസിൽ അതിജീവിത ആവശ്യപ്പെട്ട അഭിഭാഷകരെ സർക്കാർ അനുവദിച്ചിരുന്നു. എന്നാൽ സമാനമായ ആർജവം ഈ കേസിൽ സർക്കാർ കാണിക്കുന്നില്ലെന്നാണ് ആക്ഷേപം.

അപ്പീൽ ഘട്ടത്തിൽ സ്പെഷ്യൽ പ്രോസിക്യൂട്ടറെ നിയമിക്കാൻ വലിയ നടപടിക്രമങ്ങൾ ആവശ്യമില്ലാത്ത സാഹചര്യത്തിലും സർക്കാർ മൗനം പാലിക്കുന്നത് വലിയ വിമർശനങ്ങൾക്കിടയാക്കുന്നുണ്ട്. താൻ നേരിടുന്ന അവഗണനയെക്കുറിച്ച് അഭിമുഖത്തിൽ അതിജീവിത തുറന്നു പറയുകയും ചെയ്തിരുന്നു.

അതിജീവിതയ്ക്കും മറ്റ് കന്യാസ്ത്രീകൾക്കും ഇന്ന് റേഷൻ കാർഡ് കൈമാറും

കേസിലെ അതിജീവിതയുൾപ്പെടെയുള്ള കുറവിലങ്ങാട് മഠത്തിലെ കന്യാസ്ത്രീകൾക്ക് സർക്കാർ റേഷൻ കാർഡ് അനുവദിച്ചു. ഭക്ഷണത്തിന് പോലും പ്രയാസമനുഭവിക്കുന്ന ഇവരുടെ ദുരിതാവസ്ഥ വാർത്തയായതിനെത്തുടർന്നാണ് ഭക്ഷ്യമന്ത്രി ജി.ആർ. അനിൽ ഇടപെട്ടത്.ഇന്ന് (ബുധനാഴ്ച) ഉച്ചയ്ക്ക് രണ്ട് മണിക്ക് കോട്ടയം ജില്ലാ സപ്ലൈ ഓഫീസിൽ വെച്ച് മന്ത്രി നേരിട്ട് കാർഡ് കൈമാറും.കേസിലെ അതിജീവിതയായ കന്യാസ്ത്രീയും അവരെ പിന്തുണച്ച മറ്റ് മൂന്ന് കന്യാസ്ത്രീകളും അടങ്ങുന്ന കുറവിലങ്ങാട് മഠത്തിലെ താമസക്കാർക്കാണ് കാർഡ് ലഭിക്കുക.