നല്ലൊരു ജോബ് പരസ്യം കണ്ട് അതിലേക്ക് ഓണ്‍ലൈന്‍ വഴി അപേക്ഷിച്ച്, കമ്പനി ഇങ്ങോട്ട് വിളിക്കും എന്ന് കരുതി കാത്തിരുന്നിട്ട് കാര്യമില്ല. ഓണ്‍ലൈന്‍ പോര്‍ട്ടലുകള്‍ വഴി ജോലിക്കായി അപേക്ഷിക്കുന്നത് ഒരു ഡിജിറ്റല്‍ 'ബ്ലാക്ക് ഹോളിലേക്ക്' സന്ദേശങ്ങള്‍ അയക്കുന്നത് പോലെയാണെന്ന് പല ഉദ്യോഗാര്‍ത്ഥികളും പരാതിപ്പെടുന്നു. ഈ ആശങ്ക വെറുതെയല്ലെന്ന് കണക്കുകള്‍ വ്യക്തമാക്കുന്നു. പ്രമുഖ കരിയര്‍ പ്ലാറ്റ്‌ഫോമായ ഗ്ലാസ്‌ഡോര്‍ (Glassdoor) നടത്തിയ സര്‍വേ പ്രകാരം, 70 ശതമാനത്തിലധികം ഉദ്യോഗാര്‍ത്ഥികള്‍ക്കും 2026ലെ തങ്ങളുടെ തൊഴില്‍ അന്വേഷണത്തില്‍ വലിയ പ്രതീക്ഷയില്ല.
ലോകമെമ്പാടുമുള്ള പ്രൊഫഷണലുകള്‍ എത്തിച്ചേരുന്ന യുഎഇ പോലുള്ള വിപണികളില്‍ മത്സരം കഠിനമാണ്. പലപ്പോഴും അയക്കുന്ന അപേക്ഷകള്‍ക്ക് മറുപടി ലഭിക്കാത്തതും ആവര്‍ത്തിച്ചുള്ള നിരസിക്കലുകളും സാധാരണമായിരിക്കുന്നു.

എന്താണ് യഥാര്‍ത്ഥ പ്രശ്‌നം?

നിങ്ങളുടെ സിവി (CV) ഒരു എച്ച്.ആര്‍ സെക്ഷനിലെ ജീവനക്കാരുടെ കൈകളില്‍ എത്തുന്നതിന് മുന്‍പ് തന്നെ പല പ്രക്രിയകളിലൂടെയും കടന്നുപോകേണ്ടതുണ്ട്. കമ്പനികള്‍ ഇന്ന് സിവികള്‍ തരംതിരിക്കാന്‍ ഓട്ടോമേഷന്‍ സാങ്കേതികവിദ്യകളെയാണ് കൂടുതലായി ആശ്രയിക്കുന്നത്. (സി.വി വളരെ മികച്ചതും പ്രൊഫഷണല്‍ സ്വഭാവവും ഉള്ളതായിരിക്കണമെന്ന് പ്രഥ്യേകം പറയേണ്ടതില്ലല്ലോ). 
'അപേക്ഷകളുടെ എണ്ണം വര്‍ദ്ധിച്ചതും എടിഎസ് (Applicant Tracking Systems), എഐ (AI) എന്നിവയുടെ ഉപയോഗവും കാരണം പല സിവികളും ആദ്യഘട്ടത്തില്‍ തന്നെ ഒഴിവാക്കപ്പെടുന്നു. ആ ജോലിക്ക് കൃത്യമായി അനുയോജ്യമായ പ്രവൃത്തിപരിചയവും നൈപുണ്യവുമുള്ളവരെയാണ് റിക്രൂട്ടര്‍മാര്‍ ഇന്ന് തിരയുന്നതെന്ന് ടാലന്റ് വണ്‍ (Taletn One) ഓപ്പറേഷന്‍സ് ഡയറക്ടര്‍ മുഹമ്മദ് ബഹ പറയുന്നു.

'അപ്ലൈ' ബട്ടണിന് അപ്പുറം എന്ത് ചെയ്യണം?

ഓണ്‍ലൈന്‍ പോര്‍ട്ടലുകള്‍ വഴി അപേക്ഷിക്കുന്നത് നിര്‍ത്തേണ്ടതില്ല. പക്ഷേ അത് മാത്രം മതിയെന്ന് കരുതുന്നത് തെറ്റാണെന്ന് വിദഗ്ധര്‍ പറയുന്നു. യുഎഇയിലെ തൊഴില്‍ വിപണിയില്‍ ബന്ധങ്ങള്‍ക്കും വലിയ സ്ഥാനമുണ്ട്. ലിങ്ക്ഡ്ഇന്‍ പോലുള്ള പ്രൊഫഷണല്‍ പ്ലാറ്റ്‌ഫോമുകള്‍ വഴി കമ്പനികളിലെ പ്രധാന വ്യക്തികളുമായി ബന്ധം സ്ഥാപിക്കുന്നതുവഴി അവര്‍ക്ക് നിങ്ങളുടെ കഴിവിനെക്കുറിച്ച് ശുപാര്‍ശ നല്‍കാന്‍ സാധിക്കുമെന്ന് ഫ്യൂച്ചര്‍ ടെന്‍സ് യുഎഇ (Future Tense UAE) ഡയറക്ടര്‍ കരുണ അഗര്‍വാള്‍ പറഞ്ഞു.

ഈ ടിപ്‌സുകള്‍ ഓര്‍ത്തുവയ്ക്കുക

* റെക്കമെന്‍ഡേഷന്‍: നിങ്ങളുടെ സിവി എത്ര മികച്ചതാണെങ്കിലും യുഎഇ പോലൊരു വിപണിയില്‍ ഒരാളുടെ റെക്കമെന്‍ഡേഷന്‍ നല്‍കുന്ന ഗുണം ചെറുതല്ല. എഐ അല്‍ഗോരിതങ്ങള്‍ സിവികള്‍ ഒഴിവാക്കുമ്പോള്‍, ഒരു റെഫറന്‍സ് ഉണ്ടെങ്കില്‍ അത് റിക്രൂട്ടര്‍മാരുടെ ശ്രദ്ധയില്‍ പെടാന്‍ സഹായിക്കും.

പുതിയ സമീപനം: വെറുതെ ജോലി ചോദിക്കുന്നതിന് പകരം, ആ കമ്പനിക്ക് നല്‍കാന്‍ കഴിയുന്ന പുതിയ ബിസിനസ് ആശയങ്ങളോ പരിഹാരങ്ങളോ മുന്നോട്ട് വെക്കുക.

* കീവേഡുകള്‍: സിവിയില്‍ ജോലിക്ക് അനുയോജ്യമായ കീവേഡുകള്‍ ഉള്‍പ്പെടുത്തുക (ഇത് എഐ സ്‌കാനിംഗില്‍ സിവികള്‍ തിരഞ്ഞെടുക്കപ്പെടാന്‍ സഹായിക്കും).

* ലിങ്ക്ഡ്ഇന്‍ പ്രൊഫൈല്‍: നിങ്ങളുടെ പ്രൊഫഷണല്‍ സാന്നിധ്യം ലിങ്ക്ഡ്ഇനില്‍ ശക്തമാക്കുക.

* നേരിട്ടുള്ള ആശയവിനിമയം: റിക്രൂട്ടര്‍മാരുമായും ഇന്‍ഡസ്ട്രി നെറ്റ്‌വര്‍ക്കുകളുമായും നേരിട്ട് സംസാരിക്കാന്‍ ശ്രമിക്കുക.

ചുരുക്കത്തില്‍, 2026ല്‍ യുഎഇയില്‍ ഒരു നല്ല ജോലി ലഭിക്കണമെങ്കില്‍ ഓണ്‍ലൈന്‍ അപേക്ഷകള്‍ക്കൊപ്പം മികച്ചൊരു നെറ്റ്‌വര്‍ക്ക് കെട്ടിപ്പടുക്കാനും കൂടി ഉദ്യോഗാര്‍ത്ഥികള്‍ തയ്യാറാകണം.

Online applications often feel like messages dropped into a digital black hole. This sense of helplessness is backed by data. A recent Glassdoor community poll shows that more than 70 per cent of workers are not hopeful about their job search in 2026.