കൊല്ലം: സ്ത്രീധന പീഡനത്തെ തുടര്‍ന്ന് വിസ്മയ കൊല്ലപ്പെട്ട കേസില്‍ പ്രതിയായ ഭര്‍ത്താവ് കിരണ്‍ കുമാറിനെ വീട് കയറി ആക്രമിച്ച സംഭവത്തില്‍ നാല് പേര്‍ക്കെതിരേ കേസ്. ഇവരുടെ ഫോണ്‍ സംഭാക്ഷണം പുറത്ത്. കിരണിനെ അടിച്ച ശേഷം ഫോണുമായി രക്ഷപ്പെട്ട യുവാക്കളുടെ സംഘത്തെ കിരണിനെ സുഹൃത്തെന്ന വ്യാജേന ശൂരനാട് പൊലിസ് വിളിച്ചപ്പോഴുള്ള വിവരങ്ങളാണ് പുറത്തുവന്നത്. തങ്ങള്‍ മര്‍ദ്ദിച്ചിട്ടുണ്ടെന്നും തെറിപറഞ്ഞാണ് നടന്നുപോയതെന്നും ഫോണ്‍ സംഭാഷണത്തില്‍ യുവാക്കള്‍ സമ്മതിക്കുന്നുണ്ട്.

കഴിഞ്ഞ ദിവസം രാത്രി എട്ടിനാണ് സംഭവം നടന്നത്. റോഡിലൂടെ നടന്നു പോവുകയായിരുന്ന നാലു യുവാക്കള്‍ വീട് നോക്കി വിസ്മയ കേസിന്റെ കാര്യം പറഞ്ഞ് പ്രകോപനം ഉണ്ടാക്കുകയായിരുന്നു. പിന്നാലെ വീടിനു മുന്നിലുണ്ടായിരുന്ന വീപ്പകളില്‍ അടിക്കുകയും പുറത്തിറങ്ങാന്‍ വെല്ലുവിളിക്കുകയും ചെയ്തു. തുടര്‍ന്നു പുറത്തേക്ക് വന്ന കിരണിനെ സംഘം മര്‍ദിക്കുകയായിരുന്നു. കിരണിനെ അടിച്ച് താഴെയിട്ട ശേഷം മൊബൈല്‍ ഫോണ്‍ കവര്‍ന്നതായും പരാതിയില്‍ പറയുന്നു.

അതേസമയം, ഇത് ആദ്യ സംഭവമല്ലെന്നാണ് റിപ്പോര്‍ട്ട്. മുന്‍പും പലപ്പോഴും യുവാക്കളുടെ സംഘങ്ങള്‍ ബൈക്കുകളില്‍ വീടിനു മുന്നിലെത്തി വെല്ലുവിളി നടത്താറുണ്ട്. സംഭവത്തില്‍ കണ്ടാല്‍ അറിയുന്നവരായ നാലു പേര്‍ക്കെതിരെയാണ് കേസെടുത്തതെന്നും അന്വേഷണം നടക്കുകയാണെന്നും പൊലിസ് പറഞ്ഞു.