ഇറ്റാനഗർ: അരുണാചൽ പ്രദേശിലെ തവാങ്ങിലുണ്ടായ അപകടത്തിൽ മലയാളി യുവാവ് മരിച്ചു. മലപ്പുറം സ്വദേശി മാധവ് മധു (24) ആണ് മരിച്ചത്. തവാങ്ങിലെ സേന പോയിന്റിലുള്ള തണുത്തുറഞ്ഞ തടാകത്തിന് മുകളിലൂടെ നടക്കുമ്പോഴാണ് അപകടം സംഭവിച്ചത്. അപകടത്തിൽപ്പെട്ട കൊല്ലം സ്വദേശി ബിനുപ്രകാശിനായി തിരച്ചിൽ തുടരുകയാണ്.

അപകടം സംഭവിച്ചത് ഇങ്ങനെ:

തണുത്തുറഞ്ഞ തടാകത്തിന് മുകളിലെ മഞ്ഞുപാളികളിലൂടെ നടക്കുകയായിരുന്നു ഏഴംഗ മലയാളി സംഘം. നടക്കുന്നതിനിടെ പെട്ടെന്ന് മഞ്ഞുപാളി തകരുകയും സംഘം തടാകത്തിലേക്ക് വീഴുകയുമായിരുന്നു.

തടാകത്തിൽ വീണ ഏഴുപേരിൽ അഞ്ചുപേർ അദ്ഭുതകരമായി രക്ഷപ്പെട്ടു. എന്നാൽ മാധവിനെ രക്ഷിക്കാനായില്ല. കാണാതായ ബിനുപ്രകാശിനായി സൈന്യത്തിന്റെയും പ്രാദേശിക ഭരണകൂടത്തിന്റെയും നേതൃത്വത്തിൽ തീവ്രമായ തിരച്ചിൽ തുടരുകയാണ്.

 തവാങ്ങിലെ കഠിനമായ തണുപ്പും മഞ്ഞുവീഴ്ചയും തിരച്ചിലിന് വലിയ വെല്ലുവിളിയാണ് ഉയർത്തുന്നത്.വിനോദയാത്രയ്ക്ക് എത്തിയതായിരുന്നു മലയാളി സംഘം എന്നാണ് പ്രാഥമിക വിവരം. അപകടം സംബന്ധിച്ച കൂടുതൽ വിവരങ്ങൾ ലഭ്യമായി വരുന്നതേയുള്ളൂ.