മുട്ടം: സാന്ത്വനം ചാരിറ്റബിള്‍ സൊസൈറ്റിയുടെ ആഭിമുഖ്യത്തില്‍ വര്‍ഷംതോറും നടത്തിവരാറുളള ഹൃദയ സംഗമം എന്ന ഓണാഘോഷ പരിപാടി ഇന്ന് രാവിലെ 10 മണിക്ക് വസഥം പകല്‍ വീട് അങ്കണത്തില്‍ നടക്കും.
പകല്‍വീട് അന്തേവാസികളും സാന്ത്വനം പെന്‍ഷന്‍ പദ്ധതിയുടെ ഗുണഭോക്താക്കളും സാന്ത്വനത്തിന്റെ വിവിധ ആനുകൂല്യങ്ങള്‍ക്ക് അര്‍ഹരായവരും പഞ്ചായത്തിലെ ക്യാന്‍സര്‍ രോഗികളും ഓണാഘോഷ പരിപാടിയില്‍ പങ്കെടുക്കും.
ചേപ്പാട് ഗ്രാമപഞ്ചായത്തിലെ 96 അര്‍ബുദരോഗികളില്‍ തെരഞ്ഞെടുക്കപ്പെട്ട രോഗികള്‍ക്കുളള വിപുലമായ സഹായ പദ്ധതിക്കും ഇന്ന് തുടക്കമിടും ഇതോടനുബന്ധിച്ച് രാവിലെ 10 ന് ആരംഭിക്കുന്ന പരിപാടിയില്‍ മുന്‍എം.എല്‍.എ ടി.കെ. ദേവകുമാര്‍ ഹൃദയസംഗമത്തിന്റെ ഉദ്ഘാടനം നിര്‍വ്വഹിക്കും. സാന്ത്വനം വൈസ്പ്രസിഡന്റ് കെ.വിശ്വപ്രസാദിന്റെ അദ്ധ്യക്ഷതയില്‍ചേരുന്ന യോഗത്തില്‍ കെ.പി.സി.സി ജന.സെക്രട്ടറി അഡ്വ.എം.ലിജു ഓണസന്ദേശം നല്‍കും. ക്യാന്‍സര്‍ ചികിത്സാ പദ്ധതിയുടെ ഉദ്ഘാടനം റിട്ട.എയര്‍ വൈസ്മാര്‍ഷല്‍ ടി.പി.മധുസൂദനന്‍ നിര്‍വ്വഹിക്കും. കായംകുളം മുനിസിപ്പല്‍ കൗണ്‍സിലര്‍ ഡി.അശ്വനിദേവ് പെന്‍ഷന്‍ വിതരണം ചെയ്യും.
ഓണക്കോടി വിതരണം ചേപ്പാട് ഗ്രാമ പഞ്ചായത്ത് പ്രസിഡന്റ് എസ്.സുരേഷ്‌കുമാറും സംയുക്തമായി നിര്‍വ്വഹിക്കും. സാന്ത്വനം സെക്രട്ടറി ടി.വി.വിനോബ് ,വസഥം ഡയറക്ടര്‍ എസ്.ജയചന്ദ്രന്‍ എം.മണിലേഖ,നിഷ ജയന്‍, കെ.നാരായണന്‍ കട്ടി, വി.കെ.രാജ്‌മോഹന്‍ കെ.കെ.പ്രതാപചന്ദ്രന്‍,ബി.പ്രകാശ്, റെജി മാത്യു, രാജേഷ് കളത്തില്‍ എന്നിവര്‍ സംസാരിക്കും.
തുടര്‍ന്ന് പ്രശസ്ത ഗായകന്‍ കായംകുളം ബാബു അവതരിപ്പിക്കുന്ന ഹര്‍ഷഗീതങ്ങള്‍ ചലച്ചിത്രഗാനപരിപാടി നടക്കും.
തുടര്‍ന്ന് നടക്കുന്ന ഓണസദ്യയില്‍ സാന്ത്വനം സീനിയര്‍ സിറ്റിസണ്‍ ഫോറം പ്രവര്‍ത്തകരും സാന്ത്വനം പ്രവര്‍ത്തകരും കുടുംബാംഗങ്ങളും പങ്കെടുക്കും. 35 രോഗികള്‍ക്ക് രോഗമുക്തി നേടുന്നത് വരെയുളള മരുന്നുകള്‍ സാന്ത്വനം ചാരിറ്റബിള്‍ സൊസൈറ്റി സൗജന്യമായി നല്‍കും ഏകദേശം ഒരു ലക്ഷം രൂപയോളം ഇതിന് വേണ്ടി വരുമെന്ന് കണക്കാക്കപ്പെടുന്നു.
നിരവധി സുമനസ്സുകള്‍ സഹായം വാഗ്ദാനം ചെയ്ത് മുന്നോട്ട് വന്നിട്ടുള്ളതായി സാന്ത്വനം ഭാരവാഹികള്‍ അറിയിച്ചു. ബാക്കിതുക കണ്ടെത്തുന്നതിനായി തിരുദാനം എന്ന പേരില്‍ നൂറ് രൂപയുടെ സംഭാവന കൂപ്പണ്‍ പുറത്തിറക്കാന്‍ തീരുമാനിച്ചതായും അവര്‍ പറഞ്ഞു. സെപ്റ്റംബര്‍ മാസം മുതല്‍ ക്യാന്‍സര്‍ രോഗികള്‍ക്ക് ഒരു കൈത്താങ്ങ് എന്ന പദ്ധതിയും പ്രാബല്യത്തില്‍ വരും.