ജയ്പൂർ: പ്രായപൂർത്തിയാകാത്ത വിദ്യാർത്ഥിനിയെ കഴിഞ്ഞ രണ്ട് വർഷമായി ലൈംഗികമായി പീഡിപ്പിക്കുകയും അശ്ലീല പ്രവൃത്തികൾക്ക് നിർബന്ധിക്കുകയും ചെയ്ത നീന്തൽ പരിശീലകനെതിരെ ജയ്പൂർ പൊലിസ് കേസെടുത്തു. പതിനൊന്നാം ക്ലാസ് വിദ്യാർത്ഥിനിയുടെ അമ്മ നൽകിയ പരാതിയുടെ അടിസ്ഥാനത്തിൽ ബജാജ് നഗർ പൊലിസാണ് നടപടി സ്വീകരിച്ചത്.

രണ്ട് വർഷമായി തുടരുന്ന പീഡനം:
പതിനാറ് വയസ്സുകാരിയായ പെൺകുട്ടി കഴിഞ്ഞ രണ്ട് വർഷമായി ഈ പരിശീലകന് കീഴിൽ നീന്തൽ പഠിച്ചു വരികയായിരുന്നു. ഈ കാലയളവിലുടനീളം പരിശീലകൻ കുട്ടിയോട് മോശമായി പെരുമാറുകയും അശ്ലീല പ്രവൃത്തികളിൽ ഏർപ്പെടുകയും ചെയ്തതായി പരാതിയിൽ പറയുന്നു. പീഡനം സഹിക്കവയ്യാതെ പെൺകുട്ടി മാതാപിതാക്കളെ വിവരം അറിയിക്കുകയായിരുന്നു. സ്കൂൾ അധികൃതരോട് പരാതിപ്പെട്ടിട്ടും നടപടിയുണ്ടായില്ലെന്ന് പെൺകുട്ടിയുടെ കുടുംബം ആരോപിച്ചു. പ്രതി നിലവിൽ ഒളിവിലാണ്.

എട്ടു വയസ്സുകാരിക്ക് നേരെ പീഡനം; പ്രതി കസ്റ്റഡിയിൽ
ജയ്പൂരിലെ തുങ്ക പൊലിസ് സ്റ്റേഷൻ പരിധിയിലാണ് മറ്റൊരു ഞെട്ടിപ്പിക്കുന്ന സംഭവം റിപ്പോർട്ട് ചെയ്തത്. വീടിന് സമീപം പട്ടം പറത്തിക്കൊണ്ടിരുന്ന എട്ടു വയസ്സുകാരിയെ യുവാവ് പീഡിപ്പിക്കുകയായിരുന്നു. വിവരം പുറത്തുപറയാതിരിക്കാൻ ഇയാൾ കുട്ടിയെ ഭീഷണിപ്പെടുത്തുകയും ചെയ്തു. എന്നാൽ കുട്ടി മാതാപിതാക്കളെ വിവരം അറിയിച്ചതോടെ പൊലിസിൽ പരാതി നൽകി. സംഭവത്തിൽ പ്രതിയെ പോലീസ് കസ്റ്റഡിയിലെടുത്തു.രണ്ട് സംഭവങ്ങളിലും പോക്സോ (POCSO) നിയമപ്രകാരം കേസെടുത്ത് അന്വേഷണം ഊർജിതമാക്കിയതായി എസ്.എച്ച്.ഒ പൂനം ചൗധരി അറിയിച്ചു.