മുണ്ടക്കയം: മധുരയില്‍ നിന്നു കൊച്ചിയിലേക്ക് തീര്‍ത്ഥാടകരുമായി വന്ന ടൂറിസ്റ്റ് ബസ് മുണ്ടക്കയം ടൗണില്‍ വച്ച് കത്തി നശിച്ചു. ഇന്ന് പുലര്‍ച്ചെ നാല് മണിയോടെയായിരുന്നു അപകടം. കോട്ടയം സ്വദേശിയുടെ ഉടമസ്ഥതയിലുള്ള 'മോക്ഷ' എന്ന ബസിനാണ് തീപിടിച്ചത്. ഡ്രൈവറുടെ സമയോചിതമായ ഇടപെടല്‍ മൂലം ബസിലുണ്ടായിരുന്ന 45 യാത്രക്കാരും പരിക്കേല്‍ക്കാതെ രക്ഷപ്പെട്ടു. കുട്ടികളടക്കം 45 പേര്‍ മധുരയില്‍ നിന്ന് മടങ്ങുകയായിരുന്നു.

അപകടകാരണം വ്യക്തമല്ല. ഷോര്‍ട്ട് സര്‍ക്യൂട്ട് ആണെന്ന് സംശയിക്കുന്നു. ബസ് ഓടിക്കൊണ്ടിരിക്കെ പുക ഉയരുന്നത് ശ്രദ്ധയില്‍പ്പെട്ട ഡ്രൈവര്‍ ഉടന്‍ തന്നെ വാഹനം റോഡരികില്‍ നിര്‍ത്തി യാത്രക്കാരെ പുറത്തിറക്കി. എല്ലാവരും പുറത്തിറങ്ങി നിമിഷങ്ങള്‍ക്കകം തന്നെ തീ ആളിപ്പടരുകയായിരുന്നു. വിവരമറിഞ്ഞ് സ്ഥലത്തെത്തിയ കാഞ്ഞപ്പള്ളിയില്‍ നിന്നുള്ള ഫയര്‍ഫോഴ്‌സ് യൂണിറ്റാണ് തീ പൂര്‍ണമായും അണച്ചത്.

തീപിടിത്തത്തില്‍ ബസിന്റെ സീറ്റുകളും ഉള്‍ഭാഗവും പൂര്‍ണമായും കത്തിനശിച്ചു. ബസ് പൂര്‍ണമായും കത്തിയമരുന്നതിന് മുന്‍പ് യാത്രക്കാരെ മാറ്റാന്‍ കഴിഞ്ഞതിനാല്‍ വന്‍ ദുരന്തമാണ് ഒഴിവായത്. സംഭവത്തെത്തുടര്‍ന്ന് പ്രദേശത്ത് കുറച്ചുസമയം ഗതാഗതം തടസ്സപ്പെട്ടു.

Forty-five passengers had a miraculous escape after a tourist bus traveling from Madurai to Kochi caught fire and was completely gutted in Mundakkayam town early Tuesday morning.