മസ്‌കത്ത്: അധ്യാപന മേഖലയിലെ ആഗോള മാറ്റങ്ങളും എ.ഐ വിദ്യാഭ്യാസ രംഗത്ത് സൃഷ്ടിക്കുന്ന പുതിയ സാധ്യതകളും ചര്‍ച്ച ചെയ്യുന്നതിനായി ഒമാന്‍ അന്താരാഷ്ട്ര അധ്യാപന പ്രൊഫഷന്‍ കോണ്‍ഫറന്‍സ് സംഘടിപ്പിച്ചു. മസ്‌കത്തില്‍ നടന്ന സമ്മേളനത്തില്‍ വിവിധ രാജ്യങ്ങളില്‍ നിന്നുള്ള വിദ്യാഭ്യാസ വിദഗ്ധരും നയരൂപീകരകരും പങ്കെടുത്തു.

വിദ്യാഭ്യാസ മന്ത്രി ഡോ. മദീഹ ബിന്‍ത് അഹമ്മദ് അല്‍ ഷൈബാനി ഉദ്ഘാടനം ചെയ്ത സമ്മേളനത്തില്‍, പഠനരീതികള്‍ കാലത്തിനനുസരിച്ച് മാറ്റപ്പെടേണ്ടതിന്റെ ആവശ്യകത  ചൂണ്ടിക്കാട്ടി. എ.ഐ പോലുള്ള സാങ്കേതിക വിദ്യകള്‍ വിദ്യാഭ്യാസ രംഗത്ത് ഉപയോഗിക്കുമ്പോള്‍ മനുഷ്യ മൂല്യങ്ങളും അധ്യാപകരുടെ പങ്കും കൂടുതല്‍ ശക്തിപ്പെടുത്തേണ്ടതുണ്ടെന്നും മന്ത്രി പറഞ്ഞു.

അധ്യാപകരുടെ പരിശീലനം, പഠനഫലങ്ങള്‍ മെച്ചപ്പെടുത്തല്‍, ക്ലാസ് മുറികളില്‍ സാങ്കേതിക വിദ്യയുടെ ഫലപ്രദമായ ഉപയോഗം എന്നിവയാണ് സമ്മേളനത്തിലെ പ്രധാന ചര്‍ച്ചാവിഷയങ്ങള്‍. ഭാവിയിലെ വിദ്യാഭ്യാസ സംവിധാനം അധ്യാപകരുടെ നേതൃത്വത്തോടെയും സാങ്കേതിക പിന്തുണയോടെയും മുന്നോട്ടുപോകണമെന്ന് വിദഗ്ധര്‍ അഭിപ്രായപ്പെട്ടു.

ALSO READ: ഭക്ഷ്യസുരക്ഷയ്ക്ക് കരുത്തേകാന്‍ ഒമാന്റെ കാര്‍ഷിക ഫണ്ട്; 13 പദ്ധതികള്‍ക്ക് സഹായം

ഗള്‍ഫ് രാജ്യങ്ങള്‍ ഉള്‍പ്പെടെ വിവിധ അന്താരാഷ്ട്ര സംഘടനകളുടെ പ്രതിനിധികള്‍ പങ്കെടുത്ത സമ്മേളനം, അനുഭവങ്ങളും ആശയങ്ങളും പങ്കുവെക്കുന്നതിനുള്ള വേദിയായി മാറിയതായി സംഘാടകര്‍ അറിയിച്ചു. ഭാവിയിലെ വിദ്യാഭ്യാസ നയങ്ങള്‍ രൂപപ്പെടുത്തുന്നതില്‍ ഇത്തരം സംവാദങ്ങള്‍ നിര്‍ണായകമാകുമെന്ന് വിലയിരുത്തലുണ്ട്.

Oman hosts an international conference focusing on the teaching profession, highlighting the role of artificial intelligence in transforming education and future learning methods.