മനാമ: സമുദ്ര പരിസ്ഥിതി സംരക്ഷണത്തിന്റെയും മത്സ്യസമ്പത്ത് നിലനിര്‍ത്തുന്നതിന്റെയും ഭാഗമായി ബഹ്‌റൈനില്‍ തീരക്കടല്‍ മേഖലയില്‍ കര്‍ശന പരിശോധനകള്‍ തുടരുന്നു. ഇതിന്റെ ഭാഗമായി നടത്തിയ പരിശോധനകളില്‍ 700ലധികം നിയമവിരുദ്ധ മീന്‍പിടിത്ത ഉപകരണങ്ങള്‍ പിടിച്ചെടുത്തതായി ബന്ധപ്പെട്ട അധികൃതര്‍ അറിയിച്ചു.

കഴിഞ്ഞ ജനുവരിയില്‍ നടത്തിയ പരിശോധനകളില്‍ നിരോധിത കൂടുകളും വലകളും ഉള്‍പ്പെടെയുള്ള ഉപകരണങ്ങളാണ് കണ്ടെത്തിയത്. അനുമതിയില്ലാത്ത രീതിയില്‍ മത്സ്യബന്ധനം നടത്തുന്നതും നിരോധിച്ച ഉപകരണങ്ങള്‍ ഉപയോഗിക്കുന്നതും വ്യാപകമായതിനെ തുടര്‍ന്ന് കോസ്റ്റ് ഗാര്‍ഡും ബന്ധപ്പെട്ട വകുപ്പുകളും ചേര്‍ന്നാണ് പരിശോധന ശക്തമാക്കിയത്.

ഇത്തരം ഉപകരണങ്ങള്‍ സമുദ്രത്തിലെ ചെറുമത്സ്യങ്ങളെയും ജൈവവൈവിധ്യത്തെയും ഗുരുതരമായി ബാധിക്കുന്നതിനാല്‍ അവ നീക്കം ചെയ്യുന്നത് അനിവാര്യമാണെന്ന് അധികൃതര്‍ വ്യക്തമാക്കി. നിയമലംഘനങ്ങള്‍ ആവര്‍ത്തിക്കപ്പെടുന്ന മേഖലകളിലാണ് പരിശോധനകള്‍ കൂടുതല്‍ ശ്രദ്ധ കേന്ദ്രീകരിച്ചിരിക്കുന്നത്.

ALSO READ: നായയെ നടത്തുന്നതിനിടെ ലഹരി വില്‍പ്പന; ബഹ്‌റൈനില്‍ യുവതി പിടിയില്‍

മത്സ്യബന്ധനവുമായി ബന്ധപ്പെട്ട സീസണല്‍ നിയന്ത്രണങ്ങള്‍ കര്‍ശനമായി പാലിക്കണമെന്നും അധികൃതര്‍ മുന്നറിയിപ്പ് നല്‍കി. നിരോധനകാലത്ത് നിയമവിരുദ്ധമായി മത്സ്യബന്ധനം നടത്തുന്നവര്‍ക്ക് ജയില്‍ ശിക്ഷയും പിഴയും ഉള്‍പ്പെടെയുള്ള കടുത്ത നിയമനടപടികള്‍ നേരിടേണ്ടിവരുമെന്നും വ്യക്തമാക്കി.

പരിശോധനകള്‍ തുടരുമെന്നും, സമുദ്ര വിഭവങ്ങളുടെ സംരക്ഷണത്തില്‍ മത്സ്യത്തൊഴിലാളികളുടെ സഹകരണം അനിവാര്യമാണെന്നും അധികൃതര്‍ അറിയിച്ചു.

Bahrain authorities intensified inspections in coastal waters, seizing more than 700 illegal fishing gear to protect marine life and ensure sustainable fishing practices.