തിരുവനന്തപുരം: പ്രമുഖ പ്രവാസി വ്യവസായി ഡോ. ബി. രവി പിള്ളയുടെ നേതൃത്വത്തിലുള്ള ആർ.പി ഫൗണ്ടേഷൻ നടപ്പിലാക്കുന്ന 'ഡോ. രവി പിള്ള അക്കാദമിക് എക്‌സലൻസ് സ്‌കോളർഷിപ്പിന്റെ' വിതരണോദ്ഘാടനം ഈമാസം 11ന് തിരുവനന്തപുരം നിശാഗന്ധി ഓഡിറ്റോറിയത്തിൽ മുഖ്യമന്ത്രി  പിണറായി വിജയൻ നിർവഹിക്കും. മാസ്‌കോട്ട് ഹോട്ടലിൽ നടത്തിയ വാർത്താ സമ്മേളനത്തിൽ നോർക്ക റൂട്ട്‌സ് ചീഫ് എക്‌സിക്യൂട്ടീവ് ഓഫിസർ അജിത് കോളശേരിയാണ് ഇക്കാര്യമറിയിച്ചത്.

സാമ്പത്തികമായി പിന്നോക്കം നിൽക്കുന്ന പഠനമികവുള്ള വിദ്യാർഥികൾക്കായി നടപ്പിലാക്കുന്ന ഈ പദ്ധതിയിൽ അടുത്ത 50 വർഷത്തേക്ക് 525 കോടിയാണ് നീക്കിവച്ചിരിക്കുന്നത്. ആദ്യ ഘട്ടത്തിൽ 1,500 വിദ്യാർഥികൾക്ക് 10 കോടി ഈ വർഷം വിതരണം ചെയ്യും.

നോർക്ക റൂട്ട്‌സ് സി.ഇ.ഒ ചെയർമാനായുള്ള പ്രത്യേക അപ്രൂവൽ കമ്മിറ്റിയാണ് അർഹരായ വിദ്യാർഥികളെ കണ്ടെത്തിയത്. ആർ.പി ഫൗണ്ടേഷനെ പ്രതിനിധീകരിച്ച് ഗണേഷ് രവി പിള്ള, ഡോ. ആരതി രവി പിള്ള എന്നിവരും നോർക്ക റൂട്ട്‌സ് ജനറൽ മാനേജരും കമ്മിറ്റിയിൽ അംഗങ്ങളായിരുന്നു. 10,942 അപേക്ഷകളിൽ നിന്നാണ് 1,500 പേരെ തിരഞ്ഞെടുത്തത്. ഓരോ വിഭാഗത്തിലും 20 ശതമാനം സ്‌കോളർഷിപ്പുകൾ പ്രവാസി കേരളീയരുടെ മക്കൾക്കും 5 ശതമാനം ഭിന്നശേഷി വിദ്യാർഥികൾക്കും നൽകും.

ഹയർ സെക്കൻഡറി വിഭാഗത്തിൽ (സ്റ്റേറ്റ്, സി.ബി.എസ്.ഇ, ഐ.സി.എസ്.ഇ) 1,100 വിദ്യാർഥികൾക്ക് 50,000 രൂപ വീതം 5.5 കോടി രൂപ നൽകും. ഇതിൽ സംസ്ഥാന സിലബസിൽ നിന്ന് 950 പേരും സി.ബി.എസ്.ഇയിൽ നിന്ന് 100 പേരും ഐ.സി.എസ്.ഇയിൽ നിന്ന് 13 പേരുമാണുള്ളത്. ബിരുദ തലത്തിൽ ആകെ രണ്ട് കോടിയും ബിരുദാനന്തര ബിരുദത്തിന് ആകെ 2.5 കോടി രൂപയുമാണ് വിതരണം ചെയ്യുന്നത്.