തിരുവനന്തപുരം: ശബരിമല സ്വര്‍ണ്ണക്കടത്തുകേസിലെ മുഖ്യപ്രതി ഉണ്ണികൃഷ്ണന്‍ പോറ്റിയുമായുള്ള ബന്ധത്തെ കുറിച്ച് മുന്‍ ദേവസ്വം വകുപ്പ് മന്ത്രി കടകംപള്ളി സുരേന്ദ്രന്റെ വാദങ്ങള്‍ പൊളിയുന്നു. ഇരുവരും ഒരുമിച്ചുള്ള കൂടുതല്‍ ചിത്രങ്ങള്‍ പുറത്ത്. ഒന്നിലധികം തവണ കടകംപള്ളി പോറ്റിയുടെ വീട്ടിലെത്തിയെന്ന് വ്യക്തമാകുന്ന ചിത്രങ്ങളാണ് പുറത്തായത്. ഇരുവരും തമ്മില്‍ അടുത്ത ബന്ധമുണ്ടെന്ന് വ്യക്തമാക്കുന്നതാണ് ചിത്രങ്ങള്‍.

ഉണ്ണികൃഷ്ണന്‍ പോറ്റിയുടെ വീട്ടില്‍ ഒരുതവണ താന്‍ പോയിട്ടുണ്ടെന്നായിരുന്നു കടകംപള്ളി സുരേന്ദ്രന്‍ നേരത്തെ പറഞ്ഞിരുന്നത്. പോറ്റിയെ അറിയാമെന്നും 2017ല്‍ പോറ്റിയുടെ വീട്ടില്‍ പോയിരുന്നെന്നുമാണ് കടകംപള്ളി പറഞ്ഞിരുന്നത്. ഒരുകുട്ടിയുടെ ചടങ്ങില്‍ പങ്കെടുക്കാനാണ് പൊലിസ് അകമ്പടിയോടെ പോയതെന്ന് പറഞ്ഞപ്പോള്‍ അത്തരത്തിലൊരു ചടങ്ങ് നടന്നിരുന്നില്ലെന്ന് മാധ്യമ പ്രവര്‍ത്തകര്‍ ചൂണ്ടിക്കാട്ടിയപ്പോള്‍ ഓര്‍ക്കുന്നില്ലെന്നായിരുന്നു മറുപടി. പോറ്റിയോട് താന്‍ ഉപഹാരമൊന്നും വാങ്ങിയിട്ടില്ലെന്നും പറഞ്ഞ കടകംപള്ളി, എന്നാല്‍ ബംഗളൂരുവില്‍ വച്ച് പോറ്റിയുമായി കൂടിക്കാഴ്ച നടത്തിയതിനെപ്പറ്റിയുള്ള ചോദ്യത്തോട് പ്രതികരിക്കാന്‍ തയാറായിരുന്നില്ല. 

ALSO READ: ശബരിമല സ്വർണ്ണക്കൊള്ള; മൊഴികളിൽ വൈരുദ്ധ്യമുണ്ടെങ്കിൽ അടൂർ പ്രകാശിനെ വീണ്ടും എസ്‌ഐടി ചോദ്യം ചെയ്യും

സ്വര്‍ണ്ണക്കടത്തുമായി ബന്ധപ്പെട്ട് കടകംപള്ളി സുരേന്ദ്രന്റെ മൊഴി എസ്‌ഐടി രേഖപ്പെടുത്തിയിരുന്നു. ഉണ്ണികൃഷ്ണന്‍ പോറ്റിയെ അറിയാമെങ്കിലും സ്വര്‍ണം പൂശല്‍ പോറ്റിയെ ഏല്‍പിക്കാനുള്ള ബോര്‍ഡ് തീരുമാനത്തില്‍ ഇടപെട്ടില്ലെന്നാണ് കടകംപള്ളി മൊഴി നല്‍കിയത്. പ്രധാനപ്രതി ഉണ്ണികൃഷ്ണന്‍ പോറ്റിയുമായുള്ള ബന്ധത്തെ കുറിച്ചുള്ള ചോദ്യത്തിന് സ്പോണ്‍സര്‍ എന്ന നിലയില്‍ പോറ്റിയെ അറിയാമെന്നും എന്നാല്‍ ഇടപാടുകളില്‍ പങ്കില്ലെന്നും സ്വര്‍ണപ്പാളികള്‍ പോറ്റിക്ക് കൈമാറാനുള്ള തീരുമാനത്തില്‍ ദേവസ്വം മന്ത്രി എന്ന നിലയില്‍ ഇടപെട്ടില്ലെന്നുമനാണ് കടകംപള്ളി മൊഴിനല്‍കിയത്.

2019ല്‍ പത്മകുമാര്‍ ബോര്‍ഡ് പ്രസിഡന്റായിരുന്ന കാലത്ത് ഉണ്ണികൃഷ്ണന്‍ പോറ്റിക്ക് സ്വര്‍ണപ്പാളികള്‍ കൈമാറിയപ്പോള്‍ കടകംപള്ളിയായിരുന്നു ദേവസ്വം മന്ത്രി.