കോഴിക്കോട്: ആരോഗ്യരംഗത്തെ വാണിജ്യവല്‍ക്കരണവും മരുന്ന് മാഫിയകളുടെ കടന്നുകയറ്റവും നിയന്ത്രിക്കാന്‍ സര്‍ക്കാര്‍ അടിയന്തരമായി നിയമനിര്‍മ്മാണം നടത്തണമെന്ന് സമസ്ത കേരള ജംഇയ്യത്തുല്‍ ഉലമ നൂറാം വാര്‍ഷിക സമ്മേളനം പ്രമേയത്തിലൂടെ ആവശ്യപ്പെട്ടു. ആരോഗ്യരംഗം കച്ചവടമല്ലെന്നും അന്തസ്സോടെ ജീവിക്കാനുള്ള പൗരന്റെ ഭരണഘടനാപരമായ അവകാശത്തിന്റെ ഭാഗമാണെന്നും സമ്മേളനം ഓര്‍മ്മിപ്പിച്ചു.

പൗരന്മാരുടെ ആരോഗ്യനിലവാരം ഉയര്‍ത്തുക എന്നത് സര്‍ക്കാരിന്റെ പ്രാഥമിക കടമയാണെന്ന് സുപ്രീംകോടതി വിധികള്‍ ചൂണ്ടിക്കാട്ടി പ്രമേയം വ്യക്തമാക്കി. ചികില്‍സാ രംഗത്തെ അനഭിലഷണീയമായ പ്രവണതകളും മാഫിയാവല്‍ക്കരണവും സാധാരണക്കാരെ കടുത്ത പ്രയാസത്തിലാക്കുകയാണ്. മരുന്നുകളുടെ വിലയും ചികില്‍സാ ഫീസുകളും ഏകീകരിക്കാന്‍ ആവശ്യമായ നടപടികള്‍ സര്‍ക്കാരിന്റെ ഭാഗത്തുനിന്നുണ്ടാകണമെന്ന് സമ്മേളനം ആവശ്യപ്പെട്ടു.

ജീവിതശൈലീ രോഗങ്ങള്‍ അനിയന്ത്രിതമായി വര്‍ദ്ധിക്കുന്ന സാഹചര്യത്തില്‍ ഓരോ വ്യക്തിയും ആരോഗ്യപരിപാലനത്തില്‍ ജാഗ്രത പുലര്‍ത്തണം. ഭക്ഷണരീതികളിലടക്കം പ്രവാചക തിരുചര്യകള്‍ പാലിക്കുന്നത് രോഗങ്ങളെ പ്രതിരോധിക്കാന്‍ സഹായിക്കും. ആരോഗ്യകരമായ ജീവിതക്രമം വിശ്വാസികള്‍ ശീലമാക്കണമെന്നും സമ്മേളനം ഉണര്‍ത്തി. ഡോ. ബഹാഉദ്ദീന്‍ നദ്‌വി കൂരിയാട് അവതരിപ്പിച്ച പ്രമേയത്തെ ത്വാഖ അഹ്മദ് മൗലവി പിന്താങ്ങി.

needed to prevent mafia influence in the healthcare sector resolution passed at samastha 100 anniversary conference

needed to prevent mafia influence in the healthcare sector: resolution passed at samastha conference