ഐപിഎല്ലില്‍ കരുത്തരായ ടീമാണ് മുംബൈ ഇന്ത്യന്‍സ്. എന്നാല്‍ വെറ്ററന്‍താരം രോഹിത് ശര്‍മയെ മാറ്റി ഹാര്‍ദിക് പാണ്ട്യക്ക് ക്യാപ്റ്റന്‍സി നല്‍കിയത് മുതല്‍ തിരിച്ചടികളിലൂടെയാണ് ടീം മുന്നോട്ട് പോയിക്കൊണ്ടിരിക്കുന്നത്. സ്റ്റേഡിയങ്ങളിലെല്ലാം ആരാധകരുടെ പ്രതിഷേധവും പരിഹാസങ്ങളുമാണ് നേരിടേണ്ടി വരുന്നത്. ടീമിനകത്ത് തന്നെ ഒരു വിഭാഗം ഇടഞ്ഞു നില്‍ക്കുന്നുമുണ്ട്. ടീമിന് ഇതുവരെ ജയിക്കാനും കഴിഞ്ഞിട്ടില്ല. മൂന്നില്‍ മൂന്നും പരാജയപ്പെട്ട് ദയനീയ അവസ്ഥയിലാണ് ടീം.

ഇപ്പോഴിതാ മുംബൈയുടെ പ്രകടനത്തില്‍ അഭിപ്രായവുമായി എത്തിയിരിക്കുകയാണ് മുന്‍ ഇന്ത്യന്‍ ഓപ്പണര്‍ വിരേന്ദര്‍ സെവാഗ്. തിരിച്ചടികളില്‍ നിന്നും തിരികെ വരാന്‍ കഴിവുള്ള ടീമാണ് മുംബൈ ഇന്ത്യന്‍സ്. എന്നാല്‍ ഇപ്പോള്‍ ക്യാപ്റ്റന്‍ മാറി, രോഹിത്തിന്റെ മുംബൈക്ക് അത് സാധ്യമായിരുന്നു. ഹാര്‍ദിക്കിന് അത് കഴിയില്ല, സെവാഗ് പറഞ്ഞു. തോല്‍വികളില്‍ നിന്നും പ്രചോദനമുള്‍ക്കൊണ്ട് മുന്നേറുകയാണ് മുംബൈ ഇനി ചെയ്യേണ്ടതെന്നും സെവാഗ്  കൂട്ടിച്ചേര്‍ത്തു.

അതേസമയം സണ്‍റൈസേഴ്‌സുമായുള്ള മത്സരശേഷം ടീം ഉടമ കാവ്യ മാരനുമായി രോഹിത് നടത്തിയ കൂടിക്കാഴ്ചയും ചര്‍ച്ചയായിരുന്നു. ഐപിഎല്‍ 2025 സീസണില്‍ മെഗാ ലേലം നടക്കുന്നത് കൊണ്ട് തന്നെ രോഹിത് മറ്റൊരു ടീമിലേക്ക് മാറുന്നുവെന്ന അഭ്യൂഹവും ശക്തമാണ്.