ഇടുക്കി;  ഇടുക്കിയില്‍ ആര്‍.ആര്‍.ടി സംഘത്തെ വിപുലീകരിച്ച് വനംവകുപ്പ്. കാട്ടാന ശല്യം രൂക്ഷമായ ഇടുക്കി ചിന്നക്കനാലിലാണ് ആര്‍.ആര്‍.ടി സംഘത്തെ നിയോഗിച്ചത്. 24 മണിക്കൂറും പ്രവര്‍ത്തിക്കാനാകും വിധം ആവശ്യത്തിന് ജീവനക്കാരെയും അത്യാധുനിക സംവിധാനങ്ങളും വനം വകുപ്പ് ഒരുക്കിയിട്ടുണ്ട്. കാട്ടാനകളുടെ സാന്നിധ്യം മുന്‍കൂട്ടി അറിയുന്നതിനും പ്രതിരോധിക്കുന്നതിനുമായി ആര്‍.ആര്‍.ടിയുടെ സേവനം 24 മണിക്കൂറും ഉറപ്പാക്കുമെന്നാണ് വനം വകുപ്പിന്റെ വാഗ്ദാനം. 

അരിക്കൊമ്പനെ മാറ്റിയെങ്കിലും ചിന്നക്കനാലിലെ പ്രശ്‌നങ്ങള്‍ തീരാത്തതോടെയാണ് വനംവകുപ്പിന്റെ അടുത്ത നീക്കം. ചക്കക്കൊമ്പനും മൊട്ടവാലനും മറ്റു കാട്ടാനക്കൂട്ടങ്ങളും നാട്ടുകാരുടെ ഉറക്കം കെടുത്താന്‍ തുടങ്ങിയിട്ട് നാളുകളായി. ഈ വര്‍ഷം മാത്രം പ്രദേശവാസികളായ രണ്ടുപേരടക്കം അഞ്ചുപേരാണ് കാട്ടാന ആക്രമണത്തില്‍ കൊല്ലപ്പെട്ടത്.

 സെക്ഷന്‍ ഫോറസ്റ്റ് ഓഫിസര്‍ പി.ജി സന്തോഷിനാണ് ആര്‍.ആര്‍.ടി യുടെ ചുമതല. നാലു വനംവകുപ്പ് ഉദ്യോഗസ്ഥരും പത്ത് താല്‍ക്കാലിക വാച്ചര്‍മാരും സംഘത്തിലുണ്ടാകും. കാട്ടാനകളെ നിരീക്ഷിക്കുന്നതിന് ഡ്രോണ്‍ അടക്കമുള്ള ആധുനിക സാങ്കേതിക വിദ്യകളും ഉപയോഗിക്കും.