തിരുവനന്തപുരം: റോഡുകളിൽ പരിശോധന കർശനമാക്കാനൊരുങ്ങി മോട്ടോർ വാഹന വകുപ്പ്. പരിശോധനക്കായി എംവിഡി ഇനിമുതൽ മഫ്തിയിൽ നിരത്തിലിറങ്ങും. കാൽനട യാത്രക്കാരുടെ സുരക്ഷ ഉറപ്പാക്കാൻ വേണ്ടിയാണ് ഈ നീക്കം. ട്രാൻസ്ഫോർട്ട് കമ്മീഷണറാണ് നിർദേശം നൽകിയത്. 

ജനങ്ങൾക്കിടയിൽ നിന്നും ഒരാളായി നിരീക്ഷണം നടത്താനാണ് തീരുമാനം. കാൽനട യാത്രക്കാർക്ക് വഴി നൽകാത്ത ആളുകൾക്കെതിരെ നടപടിയെടുക്കും. തിരക്കുള്ള സമയങ്ങളിൽ ആയിരിക്കും ഉദ്യോഗസ്ഥർ മഫ്തിയിൽ റോഡിൽ ഇറങ്ങുക. ഈ നീക്കത്തിൽ സീബ്രാ ക്രോസ് മുറിച്ചു കടക്കുന്ന കാൽനടയാത്രക്കാരെ പരിഗണിക്കാതെ ചീറിപാഞ്ഞുകൊണ്ട് പോവുന്ന ഡ്രൈവർമാർക്കും തിരിച്ചടിയാവും.

നിയമം ലംഘിക്കുന്ന ആളുകളുടെ ഫോട്ടോ എടുക്കുകയും പിഴയായി ഈടാക്കുന്ന ഇ ചലാനായി രജിസ്റ്റർ ചെയ്ത മൊബൈൽ നമ്പറിലേക്ക് അയക്കും. സീബ്രാ ലൈനിൽ നിന്നും മുകളിലോ ലൈനിൽ നിന്നും 1.5 മീറ്റർ ദൂരപരിധി പാലിക്കാതെ വാഹനം നിർത്തുന്നവരും പിഴ നൽകേണ്ടി വരും.