അമേരിക്കയും ഇസ്രാഈലും സംയുക്തമായി നടത്തിയ ആക്രമണത്തിന് പിന്നാലെ പശ്ചിമേഷ്യന്‍ മേഖല അതീവ ഗുരുതരമായ യുദ്ധസാഹചര്യത്തിലേക്ക് നീങ്ങുന്നു. ഇറാന്റെ പ്രത്യാക്രമണത്തില്‍ ഇസ്രാഈലിലെ പ്രധാന നഗരങ്ങളില്‍ മിസൈലുകള്‍ പതിച്ചതായും വന്‍ നാശനഷ്ടങ്ങള്‍ ഉണ്ടായതായും റിപോര്‍ട്ടുകള്‍ പുറത്തുവരുന്നു. ഹോര്‍മുസ് കടലിടുക്ക് അടച്ചു. ലോകത്തെ ഏറ്റവും പ്രധാനപ്പെട്ട എണ്ണക്കപ്പല്‍ പാതയായ ഹോര്‍മുസ് കടലിടുക്ക് ഇറാന്‍ പൂര്‍ണ്ണമായും അടച്ചു. ഒരു കപ്പലിനെയും കടത്തിവിടില്ലെന്ന് ഇറാനിയന്‍ റെവല്യൂഷണറി ഗാര്‍ഡ് (IRGC) പ്രഖ്യാപിച്ചു. ഇത് ആഗോള വിപണിയില്‍ എണ്ണവില കുതിച്ചുയരാന്‍ കാരണമായിട്ടുണ്ട്.

ഇറാന്‍ വിക്ഷേപിച്ച നൂറുകണക്കിന് മിസൈലുകള്‍ പ്രതിരോധിക്കാന്‍ ഇസ്രാഈലിന്റെ 'അയണ്‍ ഡോം' സംവിധാനത്തിന് കഴിഞ്ഞെങ്കിലും ചില മിസൈലുകള്‍ ജനവാസ മേഖലകളില്‍ പതിച്ചതായാണ് വിവരം. തെല്‍ അവീവ് ഉള്‍പ്പെടെയുള്ള നഗരങ്ങള്‍ ഇപ്പോഴും ബങ്കറുകളിലാണ്. ഇറാന്റെ 'ട്രൂ പ്രോമിസ് 4' സൈനിക നീക്കത്തിന്റെ ഭാഗമായി മേഖലയിലെ 14 അമേരിക്കന്‍ സൈനിക താവളങ്ങള്‍ക്ക് നേരെ ആക്രമണം നടന്നതായി ഇറാന്റെ തസ്‌നീം ഏജന്‍സി റിപോര്‍ട്ട് ചെയ്തു. യുഎഇ ഉള്‍പ്പെടെയുള്ള ഗള്‍ഫ് രാജ്യങ്ങള്‍ വ്യോമപാത അടച്ചതോടെ വിമാന സര്‍വീസുകള്‍ താറുമാറായി. പ്രവാസികള്‍ സുരക്ഷിത സ്ഥാനങ്ങളിലേക്ക് മാറണമെന്ന് ഇന്ത്യന്‍ എംബസികള്‍ നിര്‍ദേശം നല്‍കി.

'അവസാനം നിങ്ങളുടെ നിയന്ത്രണത്തിലാവില്ല'- ഇറാന്‍

'തുടക്കം നിങ്ങളുടേതായിരുന്നു, എന്നാല്‍ ഇതിന്റെ ഒടുക്കം നിങ്ങളുടെ നിയന്ത്രണത്തിലായിരിക്കില്ല' എന്ന ഇറാന്റെ മുന്നറിയിപ്പ് ലോകത്തെ ഭീതിയിലാഴ്ത്തിയിട്ടുണ്ട്. ടെഹ്‌റാനില്‍ മൊബൈല്‍, ഇന്റര്‍നെറ്റ് സേവനങ്ങള്‍ തകരാറിലായെങ്കിലും സൈനിക കമാന്‍ഡ് സെന്ററുകള്‍ പൂര്‍ണ്ണ സജ്ജമാണെന്ന് ഇറാന്‍ വ്യക്തമാക്കി.

 ALSO READ: ഖാംനഈയുടെ രക്തസാക്ഷിത്വം; ആശങ്ക അറിയിച്ച് ചൈന, വെടിനിര്‍ത്തല്‍ ആവശ്യപ്പെട്ടു

അമേരിക്കയുടെ നിലപാട്
ആക്രമണം തുടരുമെന്ന സൂചനയാണ് യുഎസ് പ്രസിഡന്റ് ഡൊണാള്‍ഡ് ട്രംപ് നല്‍കുന്നത്. ഇറാന്റെ ആണവ കേന്ദ്രങ്ങള്‍ തകര്‍ക്കുക എന്ന ലക്ഷ്യത്തോടെയാണ് അമേരിക്കന്‍ യുദ്ധക്കപ്പലുകള്‍ പേര്‍ഷ്യന്‍ ഗള്‍ഫില്‍ നിലയുറപ്പിച്ചിരിക്കുന്നത്.

In a major escalation following US-Israel joint strikes, Iran has closed the strategic Strait of Hormuz and launched a massive missile barrage at Israel, pushing the region toward a full-scale war and triggering a global fuel crisis.