ന്യൂഡല്‍ഹി: ഇന്ത്യയും കാനഡയും 2.6 ബില്യണ്‍ ഡോളറിന്റെ യുറേനിയം വിതരണ കരാറില്‍ ഒപ്പുവച്ചു. ഇന്ത്യ സന്ദര്‍ശനത്തിന് എത്തിയ കനേഡിയന്‍ പ്രധാനമന്ത്രി മാര്‍ക്ക് കാര്‍ണിയുമായി ഡല്‍ഹിയിലെ ഹൈദരാബാദ് ഹൗസില്‍ വച്ച് പ്രധാനമന്ത്രി നരേന്ദ്ര മോദി നടത്തിയ ഉഭയകക്ഷി ചര്‍ച്ചക്കിടെയാണ് കരാര്‍ ഒപ്പുവച്ചത്.

യുറേനിയം വിതരണത്തിനായി കാനഡയിലെ കാമെക്കോയും ഇന്ത്യയുടെ ആണവോർജ വകുപ്പും തമ്മിലാണ് വാണിജ്യകരാര്‍ ഏര്‍പ്പെട്ടത്. 2047 ഓടെ 100 ജിഗാ വാട്ട് ആണവോർജം കൈവരിക്കുക എന്ന വിക്സിത് ഭാരത് സംരംഭത്തിന് കീഴിലുള്ള ഇന്ത്യയുടെ ആണവോർജ പദ്ധതിയുടെ ഭാഗമാണ് കരാര്‍. ഇതുള്‍പ്പെടെ 2030 ഓടെ വാര്‍ഷിക വ്യാപാരം 50 ബില്യണ്‍ ഡോളറായി ഉയര്‍ത്താനുള്ള വിവിധ കരാറുകളില്‍ ഇരു രാജ്യങ്ങളും ഒപ്പുവച്ചു.

ഇന്ത്യ-കാനഡ സമഗ്ര സാമ്പത്തിക പങ്കാളിത്ത കരാറിന്റെ (സി.ഇ.പി.എ) നിബന്ധനകള്‍, സാങ്കേതികവിദ്യയിലും നവീകരണത്തിലും സഹകരണം സംബന്ധിച്ച ഇന്ത്യ-കാനഡ-ആസ്‌ത്രേലിയ ത്രികക്ഷി ധാരണാപത്രം,

ALSO READ: റിയാദിലെ യുഎസ് എംബസിക്ക് നേരെ ഡ്രോൺ ആക്രമണം; കെട്ടിടത്തിന് ഭാഗിക നാശനഷ്ടം

കുണ്ഡലിയിലെ നാഷനല്‍ ഇന്‍സ്റ്റിറ്റ്യൂട്ട് ഓഫ് ഫുഡ് ടെക്നോളജി എന്റര്‍പ്രണര്‍ഷിപ്പ് ആൻഡ് മാനേജ്മെന്റിലെ ജോയിന്റ് പള്‍സ് പ്രോട്ടീന്‍ സെന്റര്‍ ഓഫ് എക്സലന്‍സിന്റെ പ്രഖ്യാപനം, ഗ്ലോബലിങ്ക് റിസര്‍ച്ച് ഇന്റേണ്‍ഷിപ്പുകള്‍ക്കായി ആള്‍ ഇന്ത്യ കൗണ്‍സില്‍ ഫോര്‍ ടെക്നിക്കല്‍ എഡ്യൂക്കേഷനും (എ.ഐ.സി.ടി.ഇ) കാനഡയിലെ മിറ്റാക്സും തമ്മിലുള്ള ധാരണാപത്രം, നിര്‍ണായക ധാതു സഹകരണത്തിനുള്ള ധാരണാപത്രം, പുനരുപയോഗ ഊര്‍ജം പ്രോത്സാഹിപ്പിക്കുന്നതിനുള്ള ധാരണാപത്രം, സാംസ്‌കാരിക സഹകരണം സംബന്ധിച്ച ധാരണാപത്രം എന്നീ കരാറുകളില്‍ ഒപ്പുവച്ചു.

ഇന്ത്യന്‍ ഓഷ്യന്‍ റിം അസോസിയേഷനില്‍ കാനഡ ചേരുന്നതിന് ഇന്ത്യയുടെ പിന്തുണ, ഇന്ത്യ-കാനഡ പാര്‍ലമെന്റ് ഫ്രണ്ട്ഷിപ്പ് ഗ്രൂപ്പ് സ്ഥാപിക്കല്‍, ഇന്ത്യ-കാനഡ സി.ഇ.ഒ ഫോറത്തിന്റെ പുനഃസംഘടന, ഇന്ത്യ-കാനഡ പ്രതിരോധ സംഭാഷണം സ്ഥാപിക്കല്‍, മാര്‍ച്ച് 17 മുതല്‍ 30 വരെ ന്യൂഡല്‍ഹിയില്‍ നടക്കാനിരിക്കുന്ന ഭാരത് ട്രൈബ്സ് ഫെസ്റ്റ്-2026 ല്‍ കാനഡയുടെ പങ്കാളിത്തം എന്നിവ സംബന്ധിച്ച ചർച്ചകളും കൂടിക്കാഴ്ചയിൽ നടത്തി.

കാനഡ പ്രധാനമന്ത്രിയായി ചുമതലയേറ്റതിനുശേഷം മാര്‍ക്ക് കാര്‍ണിയുടെ ആദ്യ ഇന്ത്യാ സന്ദര്‍ശനമാണിത്. 2018 ന് ശേഷം കനേഡിയന്‍ പ്രധാനമന്ത്രിയുടെ ഇന്ത്യയിലേക്കുള്ള ആദ്യ ഉഭയകക്ഷി സന്ദര്‍ശനം കൂടിയാണിത്. മുതിര്‍ന്ന മന്ത്രിമാര്‍, പ്രവിശ്യാ നേതാക്കള്‍, പ്രമുഖ സി.ഇ.ഒമാര്‍ എന്നിവരടങ്ങുന്ന ഒരു കനേഡിയന്‍ ഉന്നതതല പ്രതിനിധി സംഘവും പ്രധാനമന്ത്രി കാര്‍ണിക്കൊപ്പമുണ്ടായിരുന്നു.

India and Canada have signed a landmark $2.6 billion uranium supply agreement, aiming to boost energy cooperation and achieve a $50 billion trade target by 2030. The deal was inked during Prime Minister Narendra Modi's meeting with Canadian Prime Minister Mark Carney in New Delhi.