തിരുവനന്തപുരം: സംസ്ഥാനത്തെ സർക്കാർ മെഡിക്കൽ കോളേജിലെ അധ്യാപകർ നടത്തിവന്ന സമരം താൽക്കാലികമായി പിൻവലിച്ചു. ആരോഗ്യവകുപ്പ് അഡീഷണൽ ചീഫ് സെക്രട്ടറിയുമായി കേരള ഗവൺമെന്റ് മെഡിക്കൽ കോളേജ് ടീച്ചേഴ്‌സ് അസോസിയേഷൻ (KGMCTA) നടത്തിയ ചർച്ചയെത്തുടർന്നാണ് സമരം താൽക്കാലികമായി നിർത്തിവയ്ക്കാൻ തീരുമാനിച്ചത്.

18 മാസത്തെ ശമ്പള കുടിശ്ശിക ഉടൻ അനുവദിക്കുമെന്ന സർക്കാരിന്റെ ഉറപ്പിന്മേലാണ് സമരം ഒരാഴ്ചത്തേക്ക് നീട്ടിവെച്ചത്. ശമ്പള കുടിശ്ശിക ഉടൻ വിതരണം ചെയ്യുമെന്ന് സർക്കാർ ഉറപ്പുനൽകിയിട്ടുണ്ട്. എന്നാൽ ഒരാഴ്ചയ്ക്കകം ശമ്പള കുടിശ്ശിക പൂർണമായും വിതരണം ചെയ്തില്ലെങ്കിൽ സമരം വീണ്ടും ആരംഭിക്കുമെന്നും കേരള ഗവൺമെന്റ് മെഡിക്കൽ കോളേജ് ടീച്ചേഴ്‌സ് അസോസിയേഷൻ വ്യക്തമാക്കി.

ALSO READ: ലെബനനിൽ ഇസ്റാഈൽ ആക്രമണം അതിരൂക്ഷം: 72 മരണം; ആക്രമണത്തിന് കനത്ത മറുപടി നൽകുമെന്ന് ഇറാൻ

മെഡിക്കൽ കോളേജുകളുടെ നിലവാരം ഉയർത്തുന്ന കാര്യത്തിൽ അനുകൂലമായ നിലപാട് സർക്കാർ സ്വീകരിച്ചു. ഇതോടെയാണ് കഴിഞ്ഞ 17 ദിവസമായി തുടർന്നുപോന്ന നിരാഹാര സമരം താൽക്കാലികമായി അവസാനിപ്പിച്ചത്. ഒ.പി, ശസ്ത്രക്രിയകൾ, ക്ലാസുകൾ എന്നിവയിൽ നിന്നുള്ള വിട്ടുനിൽക്കൽ ഒഴിവാക്കി ഡോക്ടർമാർ ജോലിയിൽ പ്രവേശിക്കും.

രോഗികളുടെയും വിദ്യാർഥികളുടെയും ബുദ്ധിമുട്ടുകൾ പരിഗണിച്ചാണ് സമരം താൽക്കാലികമായി നിർത്തുന്നത്. എന്നാൽ ഒരാഴ്ചയ്ക്കകം ഉത്തരവ് ഇറങ്ങിയില്ലെങ്കിൽ കൂടുതൽ ശക്തമായ സമരവുമായി മുന്നോട്ടുപോകും എന്നും KGMCTA വ്യക്തമാക്കി. കഴിഞ്ഞ രണ്ടാഴ്ചയിലധികമായി നീണ്ടുനിന്ന ഡോക്ടർമാരുടെ സമരം പിൻവലിച്ചത് സാധാരണക്കാരായ രോഗികൾക്ക് വലിയ ആശ്വാസമാണ് പകരുന്നത്. ഒരാഴ്ചയ്ക്കകം സർക്കാർ വാഗ്ദാനം പാലിക്കുമോ എന്നതിനെ ആശ്രയിച്ചിരിക്കും സമരത്തിന്റെ ഭാവി.

government medical college doctors in kerala have temporarily called off their 17-day strike following successful talks with the health department.