കോഴിക്കോട്: കൊടുംചൂടില്‍ ഉരുകിയൊലിക്കുകയാണ് നാടും നഗരവും. ഉച്ചനേരങ്ങളില്‍ മാത്രമല്ല രാവിലെത്തന്നെ വെയിലിന് ചൂടുപിടിക്കുന്നു. വൈകിട്ടും തീവ്രത ഒട്ടും കുറയുന്നില്ല. ഏതാനും നേരം വെയില്‍ കൊണ്ടാല്‍ത്തന്നെ തളരുന്ന അവസ്ഥയാണ്. 35.6 ഡിഗ്രിയാണ് ഇന്നലെ രേഖപ്പെടുത്തിയ കൂടിയ താപനില. കുറഞ്ഞ താപനില 26.6 ഡിഗ്രിയാണ്. അന്തരീക്ഷത്തിലെ ഈര്‍പ്പം (ആര്‍ദ്രത) കാരണം 43 ഡിഗ്രിക്ക് മുകളിലാണ് ചൂട് അനുഭവപ്പെടുന്നത്. 

കിഴക്കന്‍ മലയോരത്തും ഇടനാട് പ്രദേശങ്ങളിലും ഇടയ്ക്കിടയ്ക്ക് വേനല്‍മഴ പെയ്യുന്നത് ആശ്വാസമാണെങ്കിലും നഗരത്തിലെ ചൂട് അസഹനീയമാണ്. പലയിടത്തും മൂടിക്കെട്ടിയ അന്തരീക്ഷമാണ്. മേഘാവൃതമായ അന്തരീക്ഷത്തില്‍ അള്‍ട്രാവലയറ്റ് സൂചിക കുറയുമെങ്കിലും ഉയര്‍ന്ന ആര്‍ദ്രത (High Humidity) യാണ് ഉണ്ടാവുക. അന്തരീക്ഷ വായുവില്‍ അടങ്ങിയിരിക്കുന്ന ജലബാഷ്പത്തിന്റെ  അളവിനെയാണ് അന്തരീക്ഷ ഈര്‍പ്പം അഥവാ ആര്‍ദ്രത എന്ന് വിളിക്കുന്നത്. അതിനാല്‍ തന്നെ താപനില കുറഞ്ഞാലും ഉയര്‍ന്ന ഈര്‍പ്പം ഉള്ളപ്പോള്‍ അനുഭവപ്പെടുന്ന ചൂട് (Feels Temperature) കൂടുതലായിരിക്കും. ഇതുതന്നെയാണ് നിലവില്‍ ചുട്ടുപൊള്ളാനുള്ള കാരണവും. കൂടാതെ, കടല്‍ കാറ്റിനൊപ്പം ഈര്‍പ്പം അന്തരീക്ഷത്തില്‍ എത്തുന്നതിലാണ് നഗരം വെന്തുരുകുന്നത്. ഇതിനൊപ്പം തന്നെ നഗരത്തിലെ തണല്‍ മരങ്ങള്‍ മുറിച്ച് മാറ്റപ്പെട്ടതും ചൂടിന്റെ കാഠിന്യം വര്‍ധിപ്പിക്കുകയാണ്. കടുത്ത ചൂടില്‍ തണല്‍ വിരിക്കാന്‍പോലും മരങ്ങള്‍ ഇല്ലാത്ത കാഴ്ച്ചയാണ്. 

ALSO READ: നാമനിർദ്ദേശ പത്രിക സമർപ്പണം മന്ദഗതിയിൽ; സംസ്ഥാനത്ത് ഇതുവരെ ലഭിച്ചത് 32 പത്രികകൾ മാത്രം

ഈമാസം 17ഓടു കൂടി വേനല്‍മഴ ശക്തമാകുമെന്നാണ് കാലാവസ്ഥ നിരീക്ഷകര്‍ പറയുന്നത്. ഇടിയോടുകൂടിയ ശക്തമായ മഴയ്ക്കാണ് സാധ്യത. ഇതോടെ ചൂടിന് നേരിയ ശമനമുണ്ടാകുമെന്നാണ് കരുതുന്നത്. എന്നാല്‍ അന്തരീക്ഷത്തില്‍ ഈര്‍പ്പമുള്ളതിനാല്‍ വേനല്‍മഴ ശക്തമാകുന്നത് വരെ ചൂട് ഉയര്‍ന്ന് തന്നെ നില്‍ക്കും. സൂര്യാഘാതമുള്‍പ്പെടെ ഏല്‍ക്കാനുള്ള സാധ്യതയുണ്ട്. ഉച്ചനേരത്തും വെയിലത്ത് പണിയെടുക്കുന്നത് പരമാവധി ഒഴിവാക്കുക തന്നെയാണ് ഏറ്റവും പ്രധാനം. ഇതിലൂടെ നേരിട്ടുള്ള വെയിലില്‍നിന്ന് രക്ഷനേടാം. വേനല്‍മഴ കനിഞ്ഞില്ലെങ്കില്‍ വരും ദിവസങ്ങള്‍ ഇതിനേക്കാള്‍ പൊള്ളും. 

താപനില ക്രമാതീതമായി ഉയരുന്ന സാഹചര്യത്തില്‍ പൊതുജനങ്ങള്‍ അതീവജാഗ്രത പാലിക്കണമെന്ന് ആരോഗ്യ വിദഗ്ധരും കാലാവസ്ഥ നിരീക്ഷകരും ഒരുപോലെ മുന്നറിയിപ്പ് നല്‍കുന്നു.

Rising humidity levels in the atmosphere have intensified the heat, making conditions extremely uncomfortable across towns and cities. The combination of high temperatures and moisture in the air has led to a “feels-like” temperature much higher than the actual reading, causing distress among people.