വടകരപ്പതി: പഞ്ചായത്തിലെ ഒഴലപ്പതിയില്‍ കുപ്പാണ്ട കൗണ്ടന്നൂരിനടുത്ത് കര്‍ഷകര്‍ക്കുള്ള സര്‍ക്കാര്‍ നിയന്ത്രിത വിപണന കേന്ദ്ര കെട്ടിടങ്ങള്‍ നോക്കുകുത്തിയാകുന്നു. 1996ല്‍ പഞ്ചായത്ത് മന്ത്രി മണിശങ്കര്‍ അയ്യറാണ് ഉദ്ഘാടനം ചെയ്തത്. കേന്ദ്രസര്‍ക്കാര്‍ പദ്ധതിയില്‍ 40 ലക്ഷം ചിലവഴിച്ചാണ് പണികഴിച്ചത്.5200 ചതുരശ്ര അടിയിലുള്ള സര്‍ക്കാര്‍ നിയന്ത്രിത വിപണന കെട്ടിടവും 2500 ചതുരശ്ര അടിയില്‍ സംഭരണശാലയും ഉണ്ടാക്കിയിട്ടുണ്ട്.
എന്നാല്‍ ഇതുവരെ ഒരു ദിവസം പോലും പ്രവര്‍ത്തിക്കാതെ കാടുപിടിച്ച് പൂട്ടികിടക്കുന്നു. പതിനൊന്ന് വര്‍ഷം മുന്‍പ് വടകരപതി പഞ്ചായത്ത് വിട്ടുനല്‍കിയ 50 സെന്റ് സ്ഥലത്താണ്  പൂട്ടിക്കിടക്കുന്ന രണ്ടു ഭീമന്‍ വിപണന സമുച്ഛയങ്ങള്‍ സ്ഥിതിചെയ്യുന്നത്. എരുത്തിയമ്പതി,വടകരപതി, കൊഴിഞ്ഞാമ്പാറ ഫര്‍ക്കയിലെ 2200 ഏക്കര്‍ വിസ്തൃതിയില്‍ കൃഷിചെയ്യുന്ന 2500ഓളം പഴം പച്ചക്കറി കര്‍ഷകര്‍ക്ക് അനുയോജ്യമായ വിപണന സ്ഥലം തന്നെയാണ് ഇവിടം.
ഇപ്പോള്‍ കര്‍ഷകര്‍ ഇടത്തട്ടുകാരന് നല്‍കിയാണ് സ്വകാര്യ വ്യാപാരികള്‍ തീരുമാനിക്കുന്ന വിലയില്‍ ഉല്‍പ്പന്നങ്ങള്‍ വിറ്റഴിക്കുന്നത്.
കര്‍ഷകരുടെ ഉല്‍പ്പന്നങ്ങളെ പരിശോധിച്ച് ഗുണനിലവാരം സാക്ഷ്യപ്പെടുത്തി നല്‍കാന്‍ ഒരു ഗുണനിലവാര നിയന്ത്രണ പരിശോധനാകേന്ദ്രം സ്ഥാപിക്കണം. കര്‍ഷകര്‍ക്ക് കേടുവരാതെ പച്ചക്കറി സൂക്ഷിക്കാന്‍ എരുത്തിയാമ്പതിയിലെ പൂട്ടിക്കിടക്കുന്ന പഴം പച്ചക്കറി ശീതീകരണ ശാലയും പ്രവര്‍ത്തിപ്പിക്കണം.
വിപണി വിലയിലെ ഏറ്റക്കുറച്ചലുകള്‍ നിയന്ത്രിക്കാന്‍ കഴിയുന്നതരത്തില്‍ തരംത്തിരിക്കലും പെട്ടികളിലാക്കലും നടത്തി വിദേശ വിപണി ഉറപ്പാക്കാനുമുള്ള നടപടികളും ആവശ്യമാണ്. സര്‍ക്കാര്‍ ഇടപെട്ട് ഹോര്‍ട്ടികേമാര്‍പ്പിനെയോ,വി.എഫ്.പി.സി.കെ.യോ ചുമതലപ്പെടുത്തി കര്‍ഷകരുടെ സ്വന്തം വിപണി പ്രവര്‍ത്തിപ്പിച്ചാല്‍ ഇവിടുത്തെ കാര്‍ഷിക മേഖലയ്ക്ക് പുത്തനുണര്‍വ് നല്‍കാന്‍ കഴിയും. സംസ്ഥാന പുരസ്‌കാരങ്ങള്‍വരെ നേടിയിട്ടുള്ള കര്‍ഷകരുള്ള പ്രദേശമായിട്ടുപോലും സര്‍ക്കാറിന് ഇവിടെ വിപണി പ്രവര്‍ത്തിപ്പിക്കാന്‍ കഴിഞ്ഞിട്ടില്ല എന്നത് കൃഷിവകുപ്പിന്റെ കനത്ത പരാജയാണ് കാണിക്കുന്നത്.
എരുത്തിയാമ്പതിയിലെ പൂട്ടിക്കിടക്കുന്ന പഴം പച്ചക്കറി ശീതീകരണ ശാലയും പ്രവര്‍ത്തിപ്പിക്കണം. സര്‍ക്കാറിന്റെ സമഗ്ര പച്ചക്കറി വികസന പദ്ധതികളിലൂടെ കോടികള്‍ കാര്‍ഷിക മേഖലയ്ക്ക് ചിലവിടാന്‍ പദ്ധതികള്‍ ഉണ്ടാകുമ്പോള്‍ ഇതുപോലെയുള്ള പൂട്ടികിടക്കുന്നവയെ പ്രവര്‍ത്തിപ്പിക്കാനും നടപടി വേണം.
പ്രതികൂല കാലാവസ്ഥയും തൊഴിലാളി പ്രശ്‌നങ്ങളും മറികടന്ന് മാസങ്ങളോളം മണ്ണില്‍ പണിയെടുത്ത് ഉണ്ടാക്കിയ കാര്‍ഷിക ഉല്‍പ്പന്നങ്ങള്‍ വിറ്റഴിക്കാന്‍ ന്യായവില ലഭിക്കുന്ന വിപണി ഇന്നും കര്‍ഷകന് സ്വപ്നമായി തീരുന്നു. കര്‍ഷകരുടെ വിപണി തുറന്ന് പ്രവര്‍ത്തിക്കാന്‍ സര്‍ക്കാറിന്റെ വിവിധ ഏജന്‍സികളുമായി ബന്ധപ്പെട്ട് പദ്ധതിയുണ്ടാക്കി നടപ്പിലാക്കുമെന്ന് കെ.കൃഷ്ണന്‍കുട്ടി എം.എല്‍.എ പറഞ്ഞു.