ദുബൈ: ദുബൈയിലെ ബിസിനസ് സ്ഥാപനങ്ങൾക്ക് ആശ്വാസമായി ട്രേഡ് ലൈസൻസ് പുതുക്കൽ നിരക്കുകളിൽ വൻ ഇളവ്. വിവിധ ഫീസുകളിലായി വരുത്തിയ മാറ്റങ്ങൾ മൂലം ലൈസൻസ് പുതുക്കൽ ചെലവിൽ 50 ശതമാനം വരെ ലാഭമുണ്ടാക്കാൻ ചില കമ്പനികൾക്ക് സാധിക്കുന്നുണ്ടെന്ന് 'ഖലീജ് ടൈംസ്' റിപ്പോർട്ട് ചെയ്തു.

ചില ബിസിനസുകൾക്ക് പുതുക്കൽ ഫീസിൽ 40 മുതൽ 50 ശതമാനം വരെ ഇളവ് നൽകി. ഉദാഹരണത്തിന്, മുമ്പ് 37,583 ദിർഹം നൽകിയിരുന്ന സ്ഥാനത്ത് ഇപ്പോൾ 21,683 ദിർഹം മാത്രം നൽകിയാൽ മതിയാകും. ലേബർ ഫീസ്, വിദേശ നാമത്തിലുള്ള ഫീസ് (Foreign name fees), മാലിന്യ സംസ്‌കരണവുമായി ബന്ധപ്പെട്ട ഫീസുകൾ എന്നിവ പല കേസുകളിലും ഒഴിവാക്കുകയോ കുറയ്ക്കുകയോ ചെയ്തിട്ടുണ്ട്. ഫീസുകൾ കുറഞ്ഞതോടെ ലൈസൻസ് കാലാവധി തീരാൻ മാസങ്ങൾ ബാക്കിയുള്ളവർ പോലും ഇപ്പോൾത്തന്നെ പുതുക്കാൻ മുന്നോട്ടുവരുന്നുണ്ട്.

സാമ്പത്തിക പാക്കേജിന്റെ സ്വാധീനം

ബിസിനസ് രംഗത്തെ പ്രതിസന്ധികൾ ലഘൂകരിക്കുന്നതിനായി ദുബൈ സർക്കാർ പ്രഖ്യാപിച്ച 100 കോടി ദിർഹത്തിന്റെ സാമ്പത്തിക സഹായ പാക്കേജിന്റെ ഭാഗമായാണ് ഈ ആനുകൂല്യങ്ങൾ. മൂന്ന് മാസത്തേക്ക് ചില സർക്കാർ ഫീസുകൾ മാറ്റിവയ്ക്കാനുള്ള തീരുമാനവും ഇതിലുണ്ട്.

ALSO READ: അബൂദബി ഹബ്ഷാന്‍ ഗ്യാസ് പ്ലാന്റില്‍ തീപിടുത്തം; സാഹചര്യം നിയന്ത്രണവിധേയം

ആനുകൂല്യം ആർക്കെല്ലാം?

കൂടുതൽ ജീവനക്കാരുള്ള കമ്പനികൾക്കാണ് ഈ ഇളവുകൾ വഴി വലിയ സാമ്പത്തിക ലാഭമുണ്ടാകുന്നത്. കാരണം, മിക്ക സർക്കാർ ഫീസുകളും ജീവനക്കാരുടെ എണ്ണത്തെ അടിസ്ഥാനമാക്കിയാണ് കണക്കാക്കുന്നത്. എന്നാൽ ഈ ഇളവുകൾ എല്ലാ ബിസിനസുകൾക്കും ഒരേപോലെയല്ല. സ്ഥാപനത്തിന്റെ സ്വഭാവം, ലൈസൻസ് രീതി, പ്രവർത്തന മേഖല എന്നിവയ്ക്ക് അനുസരിച്ച് ഇളവുകളിൽ മാറ്റമുണ്ടാകും.

ദുബൈ സൗത്ത് പോലുള്ള മേഖലകളിലും എസ്എംഇകൾക്കായി (SMEs) വാടക ഇളവുകളും പണമടയ്ക്കാനുള്ള കാലാവധി നീട്ടിനൽകുന്നതുൾപ്പെടെയുള്ള ആനുകൂല്യങ്ങൾ പ്രഖ്യാപിച്ചിട്ടുണ്ട്. നിലവിലെ സാഹചര്യത്തിൽ പരമാവധി ലാഭം നേടുന്നതിനായി ബിസിനസ് ഉടമകൾ നേരത്തെ തന്നെ ലൈസൻസ് പുതുക്കുന്ന തിരക്കിലാണെന്ന് ഈ രംഗത്തെ കൺസൾട്ടന്റുകൾ വ്യക്തമാക്കുന്നു.

dubai announces significant relief for businesses with major discounts on license renewal fees. the new initiative could reduce costs by up to 50 percent, boosting business growth and attracting more investors.