കോഴിക്കോട്: നിയമസഭാ തെരഞ്ഞെടുപ്പ് പുരോഗമിക്കവെ കോഴിക്കോട് സൗത്ത് മണ്ഡലത്തിലെ ബിജെപി സ്ഥാനാര്‍ഥി ടി. റനീഷിനെതിരെ ഗുരുതര ആരോപണവുമായി എല്‍ഡിഎഫ്. വോട്ടര്‍മാരെ സ്വാധീനിക്കാന്‍ സ്ഥാനാര്‍ഥി പണവും ഭക്ഷ്യധാന്യങ്ങള്‍ അടങ്ങിയ കിറ്റുകളും വിതരണം ചെയ്തുവെന്ന് ആരോപിച്ച് എല്‍ഡിഎഫ് തിരഞ്ഞെടുപ്പ് കമ്മീഷന് പരാതി നല്‍കി.

കിറ്റ് വിതരണം- ഭവന സന്ദര്‍ശനത്തിനിടെ വോട്ടര്‍മാര്‍ക്ക് ഭക്ഷ്യവസ്തുക്കള്‍ അടങ്ങിയ കിറ്റുകളും പണവും നല്‍കി സ്വാധീനിക്കാന്‍ ശ്രമിച്ചുവെന്ന് എല്‍ഡിഎഫ് നേതാക്കള്‍ ആരോപിക്കുന്നു. തെരഞ്ഞെടുപ്പ് കമ്മീഷന്‍ നിശ്ചയിച്ചിട്ടുള്ള പ്രചാരണ ചെലവ് പരിധി ടി. റനീഷ് മറികടന്നതായും പരാതിയില്‍ ചൂണ്ടിക്കാട്ടുന്നു.

സമാനമായ രീതിയില്‍ തൃശ്ശൂര്‍ ഒളരിയിലെ സൂപ്പര്‍മാര്‍ക്കറ്റില്‍ നിന്ന് ഇലക്ഷന്‍ സ്‌ക്വാഡ് കിറ്റുകള്‍ പിടിച്ചെടുത്തിരുന്നു. ഇതിന്റെ തുടര്‍ച്ചയായാണ് കോഴിക്കോട്ടും ഇത്തരം പ്രവര്‍ത്തനങ്ങള്‍ നടക്കുന്നതെന്ന് എല്‍ഡിഎഫ് ആരോപിച്ചു.
നേരത്തെ, പത്രിക സമര്‍പ്പണ വേളയിലും ടി. റനീഷ് വാര്‍ത്തകളില്‍ ഇടംപിടിച്ചിരുന്നു. നോട്ടറിയുടെ ഒപ്പുമായി ബന്ധപ്പെട്ട സാങ്കേതിക പിഴവുകള്‍ കാരണം പത്രിക തള്ളപ്പെടുമെന്ന സാഹചര്യം ഉണ്ടായെങ്കിലും അവസാന നിമിഷം പിഴവ് തിരുത്തിയാണ് സ്ഥാനാര്‍ഥിത്വം ഉറപ്പിച്ചത്.

LDF has lodged a complaint with the Election Commission against BJP candidate T. Reneesh for allegedly violating the model code of conduct by distributing food kits and money to voters in the Kozhikode South constituency.