ചെന്നൈ: സത്യവാങ്മൂലത്തിലെ പൊരുത്തക്കേടില്‍ തമിഴക വെട്രി കഴകം അധ്യക്ഷനും നടനുമായ വിജയ്ക്ക് നോട്ടീസയച്ച് മദ്രാസ് ഹൈക്കോടതി. നിയമസഭാ തെരഞ്ഞെടുപ്പിനായി സമര്‍പ്പിച്ച രേഖയില്‍ വന്‍ ക്രമക്കേടുണ്ടെന്നാണ് കണ്ടെത്തല്‍. രണ്ട് വ്യത്യസ്ത മണ്ഡലങ്ങളിലായി നല്‍കിയ ആസ്തിവിവരങ്ങളില്‍ 100 കോടിയിലധികം രൂപയുടെ വ്യത്യാസമുണ്ടെന്നാണ് കോടതി നിരീക്ഷണം. 

ടിവികെ ചെയര്‍മാന്‍ വിജയ്, തിരഞ്ഞെടുപ്പ് കമ്മീഷന്‍, ആദായനികുതി വകുപ്പ്, പെരമ്പൂര്‍, തൃച്ചി (ഈസ്റ്റ്) മണ്ഡലങ്ങളിലെ റിട്ടേണിങ് ഓപീസര്‍മാര്‍ എന്നിവര്‍ക്കാണ് കോടതി നോട്ടീസയച്ചത്.ചെന്നൈ സ്വദേശിയായ വി വിഘ്‌നേഷ് സമര്‍പ്പിച്ച ഹരജിയിലാണ് ഈ നടപടി. ചീഫ് ജസ്റ്റിസ് എസ്എ ധര്‍മ്മാധികാരി, ജസ്റ്റിസ് ജി അരുള്‍ മുരുകന്‍ എന്നിവരടങ്ങിയ ഡിവിഷന്‍ ബെഞ്ചാണ് കേസ് പരിഗണിച്ചത്. ഇതൊരു ഗുരുതര ക്രമക്കേടാണ്. ഒരു മണ്ഡലത്തില്‍ സമര്‍പ്പിച്ച സത്യവാങ്മൂലത്തില്‍ നൂറ് കോടിയിലധികം രൂപയുടെ വിവരങ്ങള്‍ വെളിപ്പെടുത്തിയിട്ടില്ലെന്ന് കോടതി പരാമര്‍ശിച്ചു. വെളിപ്പെടുത്തലില്‍ ആദായനികുതി അന്വേഷണം ആവശ്യപ്പെട്ടുള്ള ഹരജി മദ്രാസ് ഹെക്കോടതി ഫയലില്‍ സ്വീകരിച്ചു. 

ALSO READ: മധ്യപ്രദേശിൽ അഞ്ച് കുട്ടികൾക്ക് എച്ച്ഐവി ബാധിച്ച സംഭവം: ബ്ലഡ് ബാങ്കിന് ഗുരുതര വീഴ്ച, രേഖകളിൽ വൻ കൃത്രിമം

പെരമ്പൂര്‍ മണ്ഡലത്തില്‍ സമര്‍പ്പിച്ച സത്യവാങ്മൂലത്തില്‍ ഏകദേശം 115.13 കോടി രൂപയുടെ ആസ്തിയാണ് കാണിച്ചിരിക്കുന്നത്. തൃച്ചി (ഈസ്റ്റ്) മണ്ഡലത്തില്‍ സമര്‍പ്പിച്ച ആസ്തി 220.15 കോടി രൂപയാണ്. ഈ വ്യത്യാസം വെറുമൊരു സാങ്കേതിക പിശകായി കാണാനാവില്ലെന്നും ആസ്തികള്‍ മനപൂര്‍വ്വം മറച്ചുവെച്ചതാണെന്നും ഹരജിയില്‍ ആരോപിക്കുന്നു.