കൊച്ചി: പെരുമ്പാവൂരില്‍ നിയമവിദ്യാര്‍ഥിനി ജിഷ ദാരുണമായി കൊലചെയ്യപ്പെട്ട കേസില്‍ എറണാകുളം പ്രിന്‍സിപ്പല്‍ സെഷന്‍സ് കോടതിയില്‍ നാളെ കുറ്റപത്രം സമര്‍പ്പിക്കും.

ലൈംഗികവൈകൃത സ്വഭാവമുള്ള പ്രതി അമീറുല്‍ ഇസ്‌ലാം(23) ജിഷയെ മാനഭംഗപ്പെടുത്താനുള്ള ശ്രമത്തിനിടെ കൊലപ്പെടുത്തിയെന്നാണ് കുറ്റപത്രത്തിലുള്ളത്. അമീറുല്‍ മാത്രമാണ് പ്രതിപ്പട്ടികയിലുള്ളത്. കേസില്‍ കുറ്റപത്രം സമര്‍പ്പിക്കുന്നതിനുള്ള 90 ദിവസത്തെ സമയപരിധി കഴിഞ്ഞ ബുധനാഴ്ച അവസാനിച്ചിരുന്നു. അറസ്റ്റിലായി 90 ദിവസത്തിനകം കുറ്റപത്രം സമര്‍പ്പിച്ചില്ലെങ്കില്‍ പ്രതിക്ക് ജാമ്യത്തിന് അര്‍ഹതയുണ്ടെന്നാണ് വ്യവസ്ഥ.
എന്നാല്‍ പൊതു അവധിയാണെങ്കില്‍ തൊട്ടടുത്ത പ്രവൃത്തിദിവസം കുറ്റപത്രം സമര്‍പ്പിക്കാമെന്ന നിയമത്തിലെ നിര്‍ദേശം അടിസ്ഥാനമാക്കിയാണ് പ്രോസിക്യൂഷന്റെ നീക്കം. തുടര്‍ച്ചയായി ഈദ്, ഓണം അവധികള്‍ വന്നത് പൊലിസ് കോടതിയില്‍ ചൂണ്ടിക്കാട്ടും. കുറ്റപത്രം വായിക്കലും വിചാരണ നടപടികളും രണ്ടാഴ്ചക്കുള്ളില്‍ ആരംഭിക്കുമെന്നാണ് പ്രതീക്ഷിക്കുന്നത്.
ഏപ്രില്‍ 28നാണ് കേരളത്തെ ഞെട്ടിച്ച കൊലപാതകം നടന്നത്. കനാല്‍ പുറമ്പോക്കിലെ ഒറ്റമുറി വീട്ടില്‍ ജിഷയെ ക്രൂരപീഡനത്തിനിരയായി മരിച്ച നിലയില്‍ കണ്ടെത്തുകയായിരുന്നു. മാസങ്ങള്‍നീണ്ട അന്വേഷണത്തിനൊടുവില്‍ ജൂണ്‍ 16നാണ് പ്രതി അമീറുല്‍ ഇസ്‌ലാമിനെ തമിഴ്‌നാട്ടിലെ കാഞ്ചീപുരത്തുനിന്ന് അറസ്റ്റുചെയ്തത്. ജിഷയെ കുത്താനുപയോഗിച്ച കത്തി വീടിന്റെ പിന്നാമ്പുറത്തേക്ക് എറിഞ്ഞു. തിരിച്ചിറങ്ങുമ്പോള്‍ സമീപത്തെ കനാലില്‍ ചെരുപ്പ് പതിഞ്ഞുപോയെന്നും കുറ്റപത്രത്തിലുണ്ട്.
അമീര്‍ ഒറ്റക്കാണ് കൃത്യം നടത്തിയതെന്നും സാഹചര്യത്തെളിവുകളും ശാസ്ത്രീയ തെളിവുകളും പ്രതിക്ക് എതിരാണെന്നും റിപ്പോര്‍ട്ടിലുണ്ട്. അമീറിന്റെ സുഹൃത്തായ അനാറുല്‍ അടക്കമുള്ളവരെക്കുറിച്ച് കുറ്റപത്രത്തില്‍ പരാമര്‍ശങ്ങളില്ല. ജിഷയെ കൊല്ലാന്‍ അനാറുല്‍ പ്രേരിപ്പിച്ചതായി പ്രതി പൊലിസിന് മൊഴി നല്‍കിയിരുന്നു.
എന്നാല്‍ കൊലപാതകം നടക്കുന്നതിന് മാസങ്ങള്‍ക്ക് മുന്‍പ് അനാറുല്‍ പെരുമ്പാവൂരില്‍നിന്ന് പോയിരുന്നതായി പൊലിസ് പറയുന്നു. വിരലടയാളം സംബന്ധിച്ച ആശയക്കുഴപ്പങ്ങള്‍ക്കും റിപ്പോര്‍ട്ടില്‍ ഉത്തരമുണ്ടെന്ന് ഉദ്യോഗസ്ഥര്‍ അറിയിച്ചു. കൊലപാതകത്തിന് ദൃക്‌സാക്ഷികളില്ലാത്ത കേസില്‍ പൊലിസ് ശേഖരിച്ച തെളിവുകള്‍ പ്രതിക്ക് പരമാവധി ശിക്ഷ വാങ്ങിക്കൊടുക്കാന്‍ പര്യാപ്തമാണോ എന്നത് സംബന്ധിച്ച് വ്യത്യസ്ത അഭിപ്രായങ്ങളുണ്ടെങ്കിലും ജിഷയുടെ വീട്ടില്‍നിന്ന് ലഭിച്ച പ്രതിയുടെ ഡി.എന്‍.എ സാമ്പിളുകളുടെ പരിശോധനാഫലമടക്കമുള്ള ശാസ്ത്രീയ തെളിവുകള്‍ പ്രതിക്ക് പരമാവധി ശിക്ഷ ഉറപ്പാക്കുന്നുണ്ടെന്ന് അന്വേഷണസംഘം പറയുന്നു.