കൊച്ചി: അഖില്‍ മാരാര്‍ക്കെതിരേ പരാതിയുമായി ഡോക്ടര്‍. പ്രസവത്തെക്കുറിച്ച് വിവാദ പരാമര്‍ശം നടത്തിയതിനാണ് എന്‍ഡിഎ സ്ഥാനാര്‍ഥി അഖില്‍ മാരാര്‍ക്കെതിരെ നിയമ നടപടി. പ്രസവം ഒരു ലളിതമായ പ്രക്രിയയാണെന്നും ആശുപത്രികളാണ് ഇതിനെ സങ്കീര്‍ണ്ണമാക്കിയതെന്നുമുള്ള മാരാരുടെ പ്രസ്താവനക്കെതിരെയാണ് ഡോ. കെ. പ്രതിഭയ ചീഫ് സെക്രട്ടറിക്ക് പരാതി നല്‍കിയത്.

പണ്ട് സ്ത്രീകള്‍ വളരെ എളുപ്പത്തില്‍ ചെയ്തിരുന്ന ഒന്നായിരുന്നു പ്രസവമെന്നും ഇന്നത്തെ ആശുപത്രികള്‍ ലാഭത്തിന് വേണ്ടി മാതാപിതാക്കളില്‍ ഭീതി നിറച്ച് പ്രസവം സിസേറിയനിലേക്ക് എത്തിക്കുകയാണെന്നുമാണ് അഖില്‍ മാരാര്‍ പറഞ്ഞത്. 'പ്രസവിച്ച ഉടനെ രണ്ട് കിലോ അരി ഇടിക്കാന്‍ പോയ സ്ത്രീകളെക്കുറിച്ച് പണ്ട് പറയാറുണ്ടായിരുന്നു' എന്നും അദ്ദേഹം കൂട്ടിച്ചേര്‍ത്തു. ഇത്തരം വസ്തുതാ വിരുദ്ധമായ കാര്യങ്ങള്‍ പ്രചരിപ്പിക്കുന്നത് സമൂഹത്തിന് തെറ്റായ സന്ദേശം നല്‍കുമെന്നും ഹോം ഡെലിവറി പോലുള്ള അപകടകരമായ പ്രവണതകള്‍ക്ക് ഇത് കാരണമാകുമെന്നും പരാതിയില്‍ ചൂണ്ടിക്കാട്ടുന്നു.

ആരോഗ്യവകുപ്പിലെ മെഡിക്കല്‍ ഓഫിസറായ ഡോ. പ്രതിഭ, വീട്ടിലെ പ്രസവം നിരുത്സാഹപ്പെടുത്താന്‍ ശക്തമായ നിയമങ്ങള്‍ വേണമെന്ന് ആവശ്യപ്പെട്ട് നേരത്തെയും രംഗത്തുവന്നിട്ടുള്ള ആളാണ്. അഖില്‍ മാരാരുടെ വിഡിയോ സോഷ്യല്‍ മീഡിയയില്‍ വലിയ ചര്‍ച്ചകള്‍ക്കും വിമര്‍ശനങ്ങള്‍ക്കുമാണ് വഴിവച്ചിരിക്കുന്നത്.

A woman doctor has approached the Chief Secretary seeking action against Akhil Marar for making misleading claims that hospitals are unnecessarily complicating the natural process of childbirth.